*TANGKA SUM NGAINAT HI SUAL TINRENG BUL A NI*


October 24, 2021 (Pathianni) thuchah.


_-PP Laldingngheta Sailo_


*Châng thlan:*

_I Timothea 6:9-10  Amaherawhchu, hausak tumte chu thlêmnaah te, thangah te, âtthlâk leh tikhawlo thei duhna tam takah te an tlu lût ṭhin, chûng duhnate chuan chhiatna leh boralnaah chuan mite a tipil ṭhin._ 


_Tangka sum ngainat hi sual tinreng bul a ni si a; chu chu ṭhenkhatten an awt a, rinna chu an kal bosan a, anmahni leh anmahni lungngaihna tam takin an inchhun tlang ta chuk a._


*Thuhma:* 

Tunlaia South Korean series lar em em mai chu "Squid game" a ni a. Netflix-a tihchhuah niin ram 83-a entu ngah ber a ni a. He series hian an show tihchhuah aṭanga rei lotêah khawvêl pumah a lâr nghal a ni. Hetah hian zirlai ṭha tak zir tur kan neiin ka hria a. Chu chu sum leh pai duh luattuknain mihring a tihchhiat dan hi a ni a. Kan Bible zirtirna nen hian a inhmeh ka ti hle a ni. 


*Squid game chu:*

Squid game-ah hian leiba ngah tak tak, a rulhna nei lo leh sum mamawh em em hovin mi hausate intihhlimna atana duan naulang infiamnaah an inel a, a chak lo chu tihhlum an ni zel a, dam khawchhuak tur chuan pakhatna nih a ngai a ni. 


A changtupa ber pawh hi sum lama tlachhe tak (broke tak) niin leiba a ngahin a nunna hial derthawnawmah a awm phah  fo mai. Chutih lai chuan sum tam tham tak mai dawn theihna hun remchang hmuin, naupang khawlai infiamna chi khat hmanga tu te'n emaw games an buatsaihah chuan tel ve a tum ta a. Chuta tel te zinga pakhatna chuan KRW (korean pawisa) 45.6 billion an hlawh dawn a ni. Sum tam tham tak dawn theihna anih avangin infiamna hlauhawm a ni tih hre mahse an inziak lût ta ruih ruih thova, intihluihna erawh a awm lo. Player 456 lai mai chu chu game khel tur chuan an inziak lut a ni. 


Game an tan hma in players te chu an inhnuhdawh duh leh duh loh an zawt vek hlawm a, nimahsela sum dawn tur a tam em avang chuan inhnuhdawh tum an awm lo. Game an ṭan tawh hnua him dam taka chhuah leh theih dan kawng awm chhun chu pakhatna nih a ni mai. 


An game khelhna hmun mawi tak chu game an tan hnu chuan thihna ruamah a chang ta, hlauh avanga ring taka ṭe ṭhawt ṭhawt ri a ri châwl lova, ṭap thâwm nen, beidawng hlau thlabar au thâwm a ri reng bawk. Inchhirin awmzia a awm lo. 


Dam khawchhuah an duh (survive an duh) avangin an thian tha ber te pawh phatsan an hreh lo, game tinah chak zawk/chak ber awm a ngai si, an damkhawchhuah nan chuan tualthah an hreh hlawm mawlh lo. 


A tawpah chuan a changtupa (Lee Jung-jae) chu pakhatna niin a dam khawchhuak awm chhun a ni. Nimahsela, a film tir lama hlim hmel pu thei reng leh nun hlimawm tak nei kha KRW 45.6 billion zet a dawn hnuah hlim hmel a pu thei tawh lo. A nui thei lova, a tawng thei bawk hek lo. Dam reng chunga thi (Living dead) ani ringawt. 


*Sual tinreng bul a ni:*

_"Tangka sum ngainat hi sual tinreng bul a ni si a; chu chu thenkhatten an awt a, rinna chu an kal bosan a, anmahni leh anmahni lungngaihna tam takin an inchhun tlang ta chuk a"_ tih kan Pathian thu hi a lo daw mawlh lo. Sum leh pai hi duhin, a dika dawk thlu lo leh a mawi leh mawi lo pawh sawi thei lovin kan ûm a. Mi rethei chanai lâksak pawh hreh lo hial leh mahni ta tur pawh ni miah lo sawh hêk pawi tih lohna, dik lo taka sum lakluh hreh lohna leh sum pathiannaah kan tlu lut a. Hei hi kan Pathianin a huat em em leh Bible pawhin a sawi tam em em kha a ni a. Sual tinreng bul chu a lo ni.


Isua kan rinna chu kan hnuai chhiah a, lan mawi hunah ringtu tha ber ni awm zia zangin inthuam mawi nan kan hmang leh a, mihringte chu kan bum thei lutuk; nimahsela engkim hmutu hian a lo chhinchhiah hmaih mawlh silo hi ala pawi dawn a ni. 


*Lungngaihna tam tak thlentu a ni:*

Chûng sum buaipui bera nei, Pathian lam reng reng an rilrua lut hman ngai lo khawpa sum pathian tute chu _anmahni leh anmahni lungngaihna tam takin an inchhun tlang ta chuk a_ tiin kan hmu zui a. Chu kan buaipui em em leh Isua kan rinna hial min nek tawm tir ṭhin tu tangka chuan eng chen chiah nge hlimna kan zawn chu min pek le? Thuhriltu chuan _"Tangka sum ngainatu chuan tangka sumah duhtawk a hmu lo vang a, hausak ngainatu chuan duhtawk a hlep hek lo vang: hei pawh hi engmah lo mai a lo ni"_ tiin a lo sawi a. A dik hle mai. Tumah hi mahni duhtâwk sum hmua, neih belh zel tum tawh lo hi kan awm lovin a hriat. Duh tâwk chin a awm tak tak lo. Kan awh ang zât pawh nei ila a aia tam duhna a lo awm leh zel ang. Solomona, khawvêla hausa tawntaw, neih loh nei lo, mit it zâwng apiang hlah lova nei zat zat thei pawhin *engmah lo mai* a lo ti hial a. Buaipui bera neih tlâk chu a lo ni lo. A ngah ngah hi a hlim hlim, a lawm lawm an ni chuang lo.


*Hlimna ber chu Isua:*

Sum ngah hi hausakna a ni lo, hlimna ber a ni lo kan tih hian retheih hi hlimna a ni kan tihna a ni kher chuang lo. A ni lo tih tichiang em emtu chu Squid game-a a tâwpa zawhna zâwttu in "Pawisa ngah em em mai leh neih rêng nei lo inanna i hria em?" tia zawhna a siama a chhânna a pêk nghal kha,  "Nun hi an tân a nuam lo ve ve," tih kha. Sum leh pai ngah leh ngah loh hi hausakna leh hlimnaa tehtu atâna kan hman dawn chuan kan ngah leh ngah loh a zirin kan nun a hlimin a hlim lo vang a, tin, kan ngah leh lutuk pawhin a hlim hek lo vang a ti a ni.


Pu Sanglianthanga hlaah chuan _"sum leh pai ngahna hi hausakna a ni lo, nuna Isua neitute hi mi hausa ber an ni"_ tih kan hmu a. Isua neitute hi mi hausa ber kan lo ni. Hausakna leh retheihna hi sum leh pai neih leh neih loh ringawta teh chi a lo ni lo. *Isua kan neih leh neih lohva teh chi a lo ni zâwk.* Rethei tê pawh Isua a neih tlat chuan a hausa a ni. He khawvel mihringten an tehna danah rethei leh tlawmin lang ṭhin mah ila, mihringte chhiarsen rual loh ro kan nei a ni. Chu ro, Isua neitute chu mi hausa ber an ni a, an nun a hlimin a thlamuang ṭhin. 


*Tlîpna:*

Tangka hian kan nunah ro a rel nasa khawp mai, thu hi a neiin min thuhnuai hneh khawp mai. Tangka salah kan tang ni ber hian a lang. Kan mamawh a ni a, kan buaipui tur a ni reng e, nimahsela, kan buaipui dan hi midang tan leh kan riinna atan hnawksak nilo se. 


Sum ngah te hi an hlim uchuak bik lova a nei lo lah kan hlim bik bawk hek lo. Tangka Pathiantu chuan a hlimna chu a tangka neih leh tlem a zirah a innghat a, pawisa note hman tur a neih chuan a hlim, a neih loh erawh chuan hlimna a awm lo tihna ani. 


Isua hi kan neih hlu ber lo ni sela, sum leh pai i neih leh neih lovin i hlimna leh lunggaihna a hril lovang.


Comments

Post a Comment

Popular posts from this blog

 *A INHRIATCHHUAH VE LEH* October 3, 2021 (Pathianni tûk) thuchah. _PP. Laldingngheta Sailo_ *Châng thlan:* _Luka 15:17-19  Tin, a inhriat chhuah veleh, ‘Ka pa hnena inhlawhfate chaw ei sen lohva nei an tam vei nen, kei lah chu hetah riltamin ka thi dawn si a!_  _Ka tho vang a, ka pa hnenah ka kal ang a, a hnenah, Ka pa, vana mi chungah leh nangma mithmuhin thil ka tisual e;_  _i fapaa vuah tlak ka ni ta lo ve; i hnena inhlawhfa pakhat angin mi siam ve rawh, ka ti ang,’ a ti a._ *Sawizauna:* Fapa tlanbo tehkhin thu hi beram bo leh duli bo chungchang tehkhin thu dawta Isua sawi a ni a. A pathum hian Pathian hmaa sima kirte chunga lâwmna a entir vek a ni. Tehkhin thua pa ber hi mi hausa tak mai, ram leh chhiahhlawh tam tak nei niin sawi a ni a. A fapate pawhin khawtlangah ngaihpawimawh hlawhin dinhmun ṭha takah an ding ngei ang tih a rinawm a. Nimahsela, chuta lungawi zo lo chuan fapa naupang zawk chuan a ro chanai lâin ram hla takah nuam chen turin a va kal ta a ni. A...
Read more
*Thlarau Thianghlim - Ringtute ralthuam* Têt lai/naupan lai khân kan indo lem/ in ṭheng ṭheng ṭhin a. Silai lem kan hmang a, kan in kâp ṭhin a. Kan kâ hmangin silai kah ri kan siam a, kan han inkâp tak tak chu kan tlu ve phak phak zel a, kan let ve tawp tawp zel ṭhin a nih kha. Nimahsela, silai tak ni lo na na na, a mu awm lo na na na chu kan tho leh mai a. Kan tlan leh zuai zuai ṭhin. Indona tak takah khatiang khan kal ta ila, khâng silai lem hmang khan va do ve ta ila, tumah kan that lovang a, kan hneh ngai lovang. Keimahni kan thi zawk hial ang. Ringtu nun chu indona a ni a, sual sipai nen ni tin kan indo ṭhin. Tam tak chuan naupan laia kan indolem ṭhin ang mai khan ralthuam lem tak tak kan hmang a, thirkawr lem kan ha a, hmanraw lem hlir kan hmangin kan inbel a. Indona mualah kan tlawm leh nge nge ṭhin. Biak Inah theihtawpa ṭhain kan inkhawm a, theihtawpa active-in Kohhranah kan che tla a, chûng chu ralthuam atan kan hmang ṭhin a. Mi beihnan kan hmang ṭhin a. A inhmang...
Read more
*Malsawmna danglam* Vawiin chu kan naute-in a  vawi thum nan vaccine a la a. A ṭap a, a khua te a sik a. Nausên mai a nih avangin ka lainat ngei mai. Hêng vaccine te hi nausên tan chuan a nâin an han chiu hian an ṭap vawn vawn zel a. Hmangaihtu tan chuan hmuh hrehawm tak a ni ṭhin. Tin, an khua a han sik a, hmangaihna leh khawngaihna nena en kan ni bawk a, hmuh an hrehawm ṭhin ngei mai.  Nimahsela, kha vaccine kha a nakin hun atan a ṭha dawn a. Natna chi hrang hrang lo do thei tura a taksa buatsaihna a nih avangin tunah hmangaihtu tan hmuh hrehawmin a tan nâ viau mahse, a khua hial tisik mahse kan tihtir lo thei lo a ni. A tun hun chauh ngaihtuahin khawngaih ta ila, nakinah natna hrang hrang lo thlengin a taksa hian a lo hmelhriat si loh chuan natna dotu a siam zung zung thei dawn si lova. A tan a ṭha dawn lo a ni. Chuvangin,tunah harsa mahse nakinah a tana ṭha zawk tur avangin kan laktir hram hram a ni. Hei hian kraws kawng min ngaihtuahtir a. "Tuarna pumpelh kawng zaw...
Read more