*A INHRIATCHHUAH VE LEH*

October 3, 2021 (Pathianni tûk) thuchah.

_PP. Laldingngheta Sailo_

*Châng thlan:*

_Luka 15:17-19  Tin, a inhriat chhuah veleh, ‘Ka pa hnena inhlawhfate chaw ei sen lohva nei an tam vei nen, kei lah chu hetah riltamin ka thi dawn si a!_ 

_Ka tho vang a, ka pa hnenah ka kal ang a, a hnenah, Ka pa, vana mi chungah leh nangma mithmuhin thil ka tisual e;_ 

_i fapaa vuah tlak ka ni ta lo ve; i hnena inhlawhfa pakhat angin mi siam ve rawh, ka ti ang,’ a ti a._

*Sawizauna:*

Fapa tlanbo tehkhin thu hi beram bo leh duli bo chungchang tehkhin thu dawta Isua sawi a ni a. A pathum hian Pathian hmaa sima kirte chunga lâwmna a entir vek a ni. Tehkhin thua pa ber hi mi hausa tak mai, ram leh chhiahhlawh tam tak nei niin sawi a ni a. A fapate pawhin khawtlangah ngaihpawimawh hlawhin dinhmun ṭha takah an ding ngei ang tih a rinawm a. Nimahsela, chuta lungawi zo lo chuan fapa naupang zawk chuan a ro chanai lâin ram hla takah nuam chen turin a va kal ta a ni. A chanai zawng zawng a lâk hian ramte pawh a tel turah ngai ila, nimahsela, a hralh niawm tak a ni a, Greek ṭawnga _synagõ_ tih an hmang a, chu chuan pawisaa chantir tih a kâwk thei a ni. A ro chanai neih zawng zawnng suma chantirin a kal chhuak ta a nih chu.

*Khawvêl chêntute hi khawvêlin a chên lêt ṭhin:*

Fapa tlanbo khân a pa hnên ata a tlan bo khân a theihtawpin khawvêl a chen a, nuam a leng a. A hlim hle mai a. *Chutah chuan nuam lutukin a awm a* tih a nih kha. A duh ang apianga awmin a duh apiang a nei thei pawh a ni mahna.

Nimahsela, a neih a han chên zo va, a inkhawhral tak tak hnu chuan a nuam chenin a han ṭhîng lêt tak tak mai chu, a chan a chhe lutuk a, vawk dinhmun mai mai pawh ît khawpin a tla chhia a ni. Kan zinga tumahin vawk nih kan châkin a rinawm loh va, vawk chaw ei châk kan awm pawh a rinawm loh. Nimahsela, fapa tlanbo kha chuan kha dinhmun kha a ît tlat a nih chu. A dinhmun chhiat dan tur kha aw. A neih ṭên ṭun laia a kawp ho te, a neih eipuitu leh chênpuitu te khân a tlansan zo va, tuma ngaihsak leh ngaihven pawh a hlawh zo tawh lo hial a nih kha. 

*Kir leh nachâng a hria:* Khati tak khân a nun hmang tawh mahse a pawimawh lai ber erawh chu *a inhriatchhuah ve leha kir leh nachang a hria kha a ni.* A kîrna hmun tur a hria a, kîr leh nachang a hre bawk a. Inngaitlawm taka kîr kha chawimawina lo pêk a ni. Khawvêl kha hmangaih viau mahse khawvêl erawhin a hmangaih lêt ve lo tih a hria a, *min hmangaihtute lakah lo chuan kan hlu lo hle a ni* tih a hre chhuak a, a hmangaihtu hnêna kîr leh duhna a nei a, kir leh nachang a hre bawk a nih kha. 

*Keini pawhin kîrna tur kan nei ang:*

Kan hri lên hma boruakah mah khân induhkhawp loh a nâ a, hri lên hnua kan boruak kan en phei chuan kan Pathian hnêna ngaihdam dîla kîrna tur kan ngahin ka ring ṭhin. Hri lên hnua kan ṭhat phah zâwkna pawh tam tak a awm tho ang a. 

Pathian fa nihna nei tawh mah ila suala tlûksan leh châng tam tak a awm ṭhin a. Kan tisual a, kan tlu nawn awn awn ṭhin. Kan duhna kan han thlang a, khawvêla tlân chu sawi loh rawngbawl inti reng chung pawhin tisa duhna kan han thlang a, kan han kal tak tak chu kan thlarau nun hi a ro kâwk kâwk a. Mite nun awh ṭhin leh an belh ṭhin kha mite nuihzat ruk, "kohhrana inhmang ve si" an tih ruk ṭhin, an nun awh loh ber maiah kan han ṭang chho va, fapa tlanbo, a ṭhianten an kiansan a, nun hahthlak taka a nung ta ang mai khan mi nun awt reng rengin hun kan han hmang a. 

Nimahsela, tam tak chuan fapa tlanbo ang a, kan inhriatchhuah pawha kir thei lo, kir tumna em em pawh nei thei lo kan awm tlat ṭhin. Hre reng chungin kan sual lui tlat a, kan bawhchhe lui tlat a. Kan nun a hniam telh telh a,kan ro telh telh ṭhin.

Hawh u, in ni ve a nih chuan kan inhriatchhuah chinah hian Lalpa hnenah i kir ang u. Kan inhriatchhuahna hmun hi kan kir ṭanna tur a lo ni. Chutah chuan ngaihdamna pawhin min lo hmuak ṭhin a lo ni.

Eng chen pawh lo dai pelh ila, eng anga thuk pawhin lo pilsan mah ila, ngaihdamna hian min la thleng phak a ni. 

*Misual thi tur an khenbeh khan chhandamna lui a hmu. Amah angin sual mah ila,min la ngaidam duh e.*

*Tlîpna:*

Khawvêl hi chuan keimahnia a ṭha ṭha, a duh duh min lâksak hnuah min kalsan mai ṭhin a. Isua erawh chuan kan tân thil ṭha reng a ui lo thung. Min pêk belh zel a duh zawk a ni. Kan mittui leh ṭahnate hian min hmangaih lotu lakah hian awmzia a nei tak tak ngai lo va, Hmangaihtu Isua erawh chuan kan laka ui nei thei miah lo khawpin min hmangaih thung a ni. Chuvangin, hmangaihtu Isua pana kir mai hi kan tân a ṭha ber a ni.