*Thlarau Thianghlim - Ringtute ralthuam*

Têt lai/naupan lai khân kan indo lem/ in ṭheng ṭheng ṭhin a. Silai lem kan hmang a, kan in kâp ṭhin a. Kan kâ hmangin silai kah ri kan siam a, kan han inkâp tak tak chu kan tlu ve phak phak zel a, kan let ve tawp tawp zel ṭhin a nih kha.

Nimahsela, silai tak ni lo na na na, a mu awm lo na na na chu kan tho leh mai a. Kan tlan leh zuai zuai ṭhin.

Indona tak takah khatiang khan kal ta ila, khâng silai lem hmang khan va do ve ta ila, tumah kan that lovang a, kan hneh ngai lovang. Keimahni kan thi zawk hial ang.

Ringtu nun chu indona a ni a, sual sipai nen ni tin kan indo ṭhin.

Tam tak chuan naupan laia kan indolem ṭhin ang mai khan ralthuam lem tak tak kan hmang a, thirkawr lem kan ha a, hmanraw lem hlir kan hmangin kan inbel a. Indona mualah kan tlawm leh nge nge ṭhin.

Biak Inah theihtawpa ṭhain kan inkhawm a, theihtawpa active-in Kohhranah kan che tla a, chûng chu ralthuam atan kan hmang ṭhin a. Mi beihnan kan hmang ṭhin a. A inhmang ve lote chu hmelma ang maia ngaiin kan diriam a, kan hmu dik lo hle ṭhin.

Nimahsela, indona mual tak tak kan han hmachhawn a, kan inthuamna tur, kan ralthuama Thlarau Thianghlim hmang lote chu kan tlu pheng phung a, hmelma hneh chu sawi loh keimahni hi kan tlawm duai duai mai ṭhin.

Thlemna hmunah Thlarau Thianghlim tel lo chuan ka awn duai duai a, ka tlu leh ṭhin. Isua ka thuam a nih loh chuan hmelma hi hmanraw lem, a ang ve tak si hmanga hneh chi a ni lo.

Pawtthira leh Hrangchala ten Kungawrhi an ven ṭum a ramhuai hoten 'huai aw' leh 'dawih aw' an hre hrang ang mai khan Kristaa thuam leh thuam loh, Thlarau Thianghlima thuam leh thuam loh hi hmelma hian a hre mai ṭhin.

Thlarau Thianghlim hi kan ralthuam a nih fo loh chuan hnehtu ni lovin a tlawm zawkah kan ṭang fo ang.

Thlarau Thianghlimin inthuam ṭhin ang che.