*SUM ROPUI ZAWK*


September 11, 2021 (Inrinni zân) thuchah.


_-PP Laldingngheta Sailo_


*Châng thlan:*

_Hebrai 11:26 Krista an hmuhsitna chu Aigupta ram rote ai chuan sum ropui zâwkah a ruat a; lâwmman pêk tur chu a thlîr ṭhin avângin."_


*Sawihawnna:*

Beirual kan hmang zo va, *Isua zuitu rinawm* tih thupuiah kan hmang a, kohhranhote'n hlâwk taka kan zir ngei ka beisei a, a rah chhuah lama ṭan lâk tum tlâng ila a ṭha âwm e. Isua kan zuina kâwnga kan harsatna hrang hrangte, chumi avânga kan rinawm theih loh dân te, rinawm tur kan nih leh kan rinawm dan tur kan zir hrang hrangte kha a taka hmang chhuaktu nih tum ṭheuh ila a lawmawm hle ang. Nizan maia kan zir aṭangin zanina kan châng thlan leh thupui hi ka rawn la chhuak a ni.


*Châng thlan sawizauna:*

Hebrai-te hnêna lehkhathawn hi a ziaktu tak sawina a awm lo va. Rin dan hrang hrang erawh a awm a. Paul-a ziak a nih ring te, Barnaba ziak a nih ring te, Apollova ziak a nih ring te, Aquila leh Priskili ziak a nih ring te an awm nawk a ni. He lehkhathawn hi lehkhathawn satliah ni mai lovin theology sawina lam a ni deuh. 


Kan châng thlan hi rinna chungchanga ding nghet tlat tura a sawmna bung (bung 11-na) aṭanga lâk a ni a. Rinna fak lo hlawh tawhte chanchin hrang hrang a chuang a ni. Chûng zingah chua Mosia pawh a tel ve a. Hebrai nau piang suat tur thupek avanga thuhrûk, bawm têa phairuang kara a nuin a dah chu Pharaoa fanuin a chhar a. Lal inah sei lianin lal fapa dinhmun hial luah thei a ni a. Nimahsela, Hebrai mi a nih avângin a chite chu a theihnghilh thei lo va, lal ina lal fapa dinhmun ang hiala a awm hnuah pawh a chipuite chu kanin, ṭum khat phei chu Aigupta mi lakah a chipui chhanin tual a that hial a ni. Aigupta mi nia ropui taka hun hman ai chuan Pathian mi a nihna kha retheihpui a thlang a, Aigupta ram ro ai chuan Krista an hmuhsitna leh tihduhdahna chu ro hlu zâwkah ngaiin a thlang a. He leia lâwmman mai ni lovin nakina lãwmman a la dawn tur chu a thlir zawk a. Pathian kohnaah chuan rinawm takin a awm ta zâwk a ni.


*Sum ropui zâwk:*

Sum hlutzia kan hria a, neih mai a harsatzia pawh kan hria. Mosia dinhmunah khân indah chhin ta ila, a kalsan kha nasa hle dawnin ka hria. Keini ni ila kan thei lo fur mai awm e.


Mosia erawh chuan Krista an hmuhsitna kha sum ropui zâwkah a ruat tlat a. Aigupta rohlu te nêna nawmchen a, rei lote chhunga hlim ai chuan Pathian mite nêna tihduhdah tuar a thlang a. Tihduhdah hrim hrim kha a thlang a ni bik lo va, lâwmman tur a thlîr tlat zâwk avâng khân rei lote chhûnga tihduhdah tuar kha a thlang ngam a. Rinawm taka a Pathian zui kha a thlang a ni. 


Rei lo tê hlima, nakina inchhir leh ai chuan hrehawm hmasaka lâwmman chhhe thei tawh lo dawn chu sum ropui zâwk a ni rêng a ni.


*Sum ropui zâwk kan thlang tur a ni:*

Ringtu, Lal Isua zuitu kan inti reng chung hian khawvêl sum leh ropuina hi thlan zâwk chang kan ngahin ka hre ṭhin. Isua zuinaa min tirinawm thei lotu chu hnar ngai a awm huna kan hnar thei lo/phal lo ṭhin hi a ni. Nuam dawn riau, hausak phah lawih dawn, hlimawm dawn riau nia kan hriat avâng hian tuna a kawng hrehawm zâwk leh zîm zâwk Isuan min thlansak lama kal hi harsa kan tiin kan peih lo fo ṭhin a. Kan lo it leh awh ngawih ngawih ṭhin lamah hian kan kal leh nge nge ṭhin.


Tuna lâwmman ai hian nakina lâwmman hi a ropui zâwk dâwn a, tuna hlimna ai hian Krista nêna hlimna vawrtawp chen hi a la nuam zâwk dâwn a ni tih hi kan theihnghilh tlat ṭhin niin a lang a. Mosia chuan he leia hrehawmna te chu van lama ropuina nên tehkhin thama ruat lovin a tuar mai a. Chuvâng chuan Pathian duhdanin rinawm takin a nun a hmantir a. Chung lama lâwmman awm thlir ve tho chung hian keini erawh chuan khawvêlah mahni duhdana nun a, thih hnua vanrama lâwmman dawn kan la dream hrâm ṭhin. Paula'n *nun Krista, thih pawh hlâwkna* a tih kha keini chuan *nun hi hlâwkna, thih hi Krista* ti zâwk hian kan lang tlat a ni. Chu chuan khawvêlah hian Pathian duhdanin min nuntir thei lo fo va. Rinawm a ngaih hunah kan duap leh ṭhin a ni.


*Tlângkawmna:*

Ringtu kan nih chuan hrehawmna hi a awm dawn a ni tih hi pawm phawt mai ila. Thlemna leh fiahna hmunah hian kan rinawmna a lang chhuak ṭhin. Thlemna leh fiahna paltlang lai hi thil hlimawm leh nuam a ni ngai lo. Rinawm taka paltlang hnuah erawh chuan lâwmna a sâng viau thung. Hemi paltlang tur hian kan hma lamah eng lawmman nge awm tih hi kan hriat a ngai bawk. Khawvêl nawmnate aia ropui zâwk a awm tih hre chungin rinawm taka Isua zui i tum tlat ang u.

Comments

Post a Comment

Popular posts from this blog

 *A INHRIATCHHUAH VE LEH* October 3, 2021 (Pathianni tûk) thuchah. _PP. Laldingngheta Sailo_ *Châng thlan:* _Luka 15:17-19  Tin, a inhriat chhuah veleh, ‘Ka pa hnena inhlawhfate chaw ei sen lohva nei an tam vei nen, kei lah chu hetah riltamin ka thi dawn si a!_  _Ka tho vang a, ka pa hnenah ka kal ang a, a hnenah, Ka pa, vana mi chungah leh nangma mithmuhin thil ka tisual e;_  _i fapaa vuah tlak ka ni ta lo ve; i hnena inhlawhfa pakhat angin mi siam ve rawh, ka ti ang,’ a ti a._ *Sawizauna:* Fapa tlanbo tehkhin thu hi beram bo leh duli bo chungchang tehkhin thu dawta Isua sawi a ni a. A pathum hian Pathian hmaa sima kirte chunga lâwmna a entir vek a ni. Tehkhin thua pa ber hi mi hausa tak mai, ram leh chhiahhlawh tam tak nei niin sawi a ni a. A fapate pawhin khawtlangah ngaihpawimawh hlawhin dinhmun ṭha takah an ding ngei ang tih a rinawm a. Nimahsela, chuta lungawi zo lo chuan fapa naupang zawk chuan a ro chanai lâin ram hla takah nuam chen turin a va kal ta a ni. A...
Read more
*Thlarau Thianghlim - Ringtute ralthuam* Têt lai/naupan lai khân kan indo lem/ in ṭheng ṭheng ṭhin a. Silai lem kan hmang a, kan in kâp ṭhin a. Kan kâ hmangin silai kah ri kan siam a, kan han inkâp tak tak chu kan tlu ve phak phak zel a, kan let ve tawp tawp zel ṭhin a nih kha. Nimahsela, silai tak ni lo na na na, a mu awm lo na na na chu kan tho leh mai a. Kan tlan leh zuai zuai ṭhin. Indona tak takah khatiang khan kal ta ila, khâng silai lem hmang khan va do ve ta ila, tumah kan that lovang a, kan hneh ngai lovang. Keimahni kan thi zawk hial ang. Ringtu nun chu indona a ni a, sual sipai nen ni tin kan indo ṭhin. Tam tak chuan naupan laia kan indolem ṭhin ang mai khan ralthuam lem tak tak kan hmang a, thirkawr lem kan ha a, hmanraw lem hlir kan hmangin kan inbel a. Indona mualah kan tlawm leh nge nge ṭhin. Biak Inah theihtawpa ṭhain kan inkhawm a, theihtawpa active-in Kohhranah kan che tla a, chûng chu ralthuam atan kan hmang ṭhin a. Mi beihnan kan hmang ṭhin a. A inhmang...
Read more
*Malsawmna danglam* Vawiin chu kan naute-in a  vawi thum nan vaccine a la a. A ṭap a, a khua te a sik a. Nausên mai a nih avangin ka lainat ngei mai. Hêng vaccine te hi nausên tan chuan a nâin an han chiu hian an ṭap vawn vawn zel a. Hmangaihtu tan chuan hmuh hrehawm tak a ni ṭhin. Tin, an khua a han sik a, hmangaihna leh khawngaihna nena en kan ni bawk a, hmuh an hrehawm ṭhin ngei mai.  Nimahsela, kha vaccine kha a nakin hun atan a ṭha dawn a. Natna chi hrang hrang lo do thei tura a taksa buatsaihna a nih avangin tunah hmangaihtu tan hmuh hrehawmin a tan nâ viau mahse, a khua hial tisik mahse kan tihtir lo thei lo a ni. A tun hun chauh ngaihtuahin khawngaih ta ila, nakinah natna hrang hrang lo thlengin a taksa hian a lo hmelhriat si loh chuan natna dotu a siam zung zung thei dawn si lova. A tan a ṭha dawn lo a ni. Chuvangin,tunah harsa mahse nakinah a tana ṭha zawk tur avangin kan laktir hram hram a ni. Hei hian kraws kawng min ngaihtuahtir a. "Tuarna pumpelh kawng zaw...
Read more