*LAL ISUA ZUITU RINAWM*

September 1, 2021 (Nilaini) thuchah.

_-PP Laldingngheta Sailo_

*Châng thlan:* _I Korinth 9:24-26  Intlansiakhote chu an zain an tlan a, nimahsela pakhat chauhvin lawmman a hmu thin tih in hre lo vem ni? In hmuh theih nan chutiang takin tlan rawh u._ 

_Tin, intihsiaknaahte chuan a bei talh talh apiang chu engkimah an insum thin a ni. Anni zawngin lallukhum chhe thei hmu turin an bei a, keini erawh chuan lallukhum chhe thei lo hmu turin._ 

_Chutichuan, tiam chin lam panin ka tlan ngat ngat a ni, boruak mai hnek lovin mahni ka inhnek zawk thin a._

*Sawihawnna:*

Zanin aṭang hian BCM pumpui huapa kum tina kan neih ṭhin Beirual chu kan ṭan leh dawn ta a. Kuminah hian kan beirual thupui atân 'Isua zuitu rinawm' tih, Rev. R. Lalrinliana ziak a ni dawn a. Bial chhung kohhran hote'n hlâwk taka he hun hi hmanga, Lal Isua zuitu rinawm tak ni ṭheuh turin kan induhsak hle a ni. 

*Châng thlan sawizauna:*

Korinth khua hi Makedonia chhunga awm niin, Greek hote khawpui a ni ṭhin a. Khawpui pawimawh leh lian tak niin Paula hunlai hian mi nuai ruk vel zek khawpuiah hian an cheng a ni. Sumdawnna hmunpui a ni a, mi hausa tak tak an cheng a. Tin, infiamna hmunpui a ni bawk. Infiamna hmunpui a nih angin Paula pawh hian tirhkoh dinhmun a sawinaah hian rawngbawltute chu intlansiaknaa tlan vea a tawp thleng tura harsatna karah pawh tlan ṭang ṭang tur leh mahni hrehawm pawh pawisa lova inhnek hial a ngaih pawha mahni inhnek mai tur a nihzia a sawi a ni. Chuti a nih loh chuan lawmman a hmuh theih loh a ti a ni.

*Stephen Akhwari: Intlansiak mi rinawm:*

Kum 1968 Olympic-ah khân Tanzania aiawhin John Stephen Akhwari chu a tel ve a. Nimahsela, lawmman pakhatna dawn chu sawi loh, lawmman dawng lova tlân thleng zingah pawh a thleng tlai ber a ni. Nimahsela, thawnthu ngaihnawm tak mai a erawh a ziak thung a.

An tlan laia a tlûknaah chuan a khup a sawh a, a ruh chuktuah pelhin a dar a sawh bawk a. A lo entu ṭhenkhatte chuan lak chhuah a, damdawi ina hruai ngai niin an hria a. Nimahsela, medical team lamin a hliama damdawi te hnawiha an tuamsak hnuah chuan track lamah kir lehin a tlân chhunzawm leh ta a. 

Mi 75 tlân zinga mi 18 lai mai chu an tlan chhunzawm thei lo va, an chawlhsan a. Ani erawh chuan tâwp mai a tum lo. Muang têin a tlân zêl a. Tichuan, lawmman pakhatna dawngtuin line tâwp a thlen hnu darkar khat vel zetah chuan Akhwari pawh chu a rawn tlan thleng ve ta hrâm a. Mipui tlêmte lo la awmte chuan chawimawi nâna ding chungin an lo lâwm a. Ni a tla hial tawh nghe nghe a ni. Chuta an interview-naah chuan inhliam chunga a tlân zêl chhan an zawt a, ani chuan, *"Kan ram hian mêl 5000 zeta hlaah hian intlânsiakna bul ṭan ringawt turin min tîr lo va. A tâwp tlân thleng turin min tîr a ni,"* tiin a chhâng a ni. Intlânsiaknaa harsatna a tawha a hlenchhuah dân leh a beih dan te, a huaisenna te kha intlansiak mi a ni tih mai aia mite sawi tam zâwk chu a ni ta tlat a ni.

*Isua zuinaah rinawm a ngai:*

Lal Isua kan zuinaah pawh hian intlânsiak ang mai kan ni a. Intlânsiaknaah chuan rinawm taka kan tlân a ngai a. Lal Isua hnung kan zuinaah hian a bul ṭan ringawt tur ni lovin a tâwp tlân thleng tura tih kan ni. *Thih thlengin rinawmin lo awm rawh* (Thup. 2:10) min titu hian kawng a bul ṭan ringawt turin min ti lo. A tâwp thleng turin min ti a ni.

Isua zui tur hian harsatna tam tak a awm tih hi kan hriat a ngai bawk a. Kan duh zâwng leh châk zâwng tam ber hi sual lam âwn zâwk leh Isua zuinaa kalpui theih loh a ni tlat mai. Suala hrin kan nih avâng pawh a ni mahna. Chumi duhna leh châkna tihhlum zêl chu thil harsa tak mai a ni a. Nimahsela, Isua zuitute hi *kawngka zîm zawhtute* kan nih miau avângin min tihnawktu thilte hi ken tel ve a theih loh va, a leng ve tlat lo a ni. Chuvângin, a harsa lai berah pawh mahni inphata a hnung zuitute hi Isua tâna mi rinawm an ni ṭhin. Paula pawhin, *"boruak mai hnek lovin mahni ka inhnek ṭhin"* a ti a. Mahni hrehawm pawisa lova kan zui hi a ngai ṭhin rêng a ni. 

*Pathian laka kan rinawmna hian kan mihringpuite lakah min tirinawm ṭhin:*

Josefa khân Potiphara nupuiin a thlêm khân mihring laka rinawm lohna khâ a rûka hmutu a Pathian tâna rinawm lohnaah a ngai tlat a. A mihringin a châk lo a ni bîk lo vang. Nu tlâwntlai ṭha leh hmelṭha tak maiina a han vehthlem vel khân a mihring duhna leh châkna kha hnar harsa a ti ngei ngei ang. Nimahsela, Pathian laka rinawm duhna a nei tlat a. Chumi avâng chuan, *"Engtin nge he sual lian tak hi tiin Pathian pawi ka sawi theih ang,"* tiin a chhânga a hnâwl ta a nih kha.

Josefa ang hian kan hma zâwna awm, kan mawhphurhna leh tih tur ṭheuhvah hian rinawm ila, kan mihringpuite rawng kan bawlsaknaah, office ah a ni emaw, labour ah a ni emaw kut hna thawka kan inhlawhnaah a ni emaw, dawrah a ni emaw, engah pawh nise, rinawm phawt mai ila. Pathian duh loh zâwng a ni tih kan hriat chuan i hnâwl ngam zêl ang u. 

Mihring chawimawina kan dawn loh ṭum a awm a nih pawhin nakinah, he leia chawimawina aia ṭha zâwk kan la dawng ngei ang. 1968 kuma Maratho race-a lawmman pakhatna dawngtu ai khân Stephen Akhwari khân hriatreng a hlawhin chawimawi a hlawh zawk daih a ni. Chuvangin, a bei ṭalh ṭalh apiangin lawmman an dawng ṭhin ang hian ringtu nunah hian harsatna kârah pawha bei ṭalh ṭalh a, Isua avânga hnâwl leh chân ṭhinte, tuar ṭhinte hian an lawmman an chân dawn tawp lo a ni tih hriain Isua hi rinawm takin i zui zêl ang u. 

Lalpan malsawm rawh se.