PHAIZÂWL PATHIAN

 *NI ENGA PATHIAN, ZAN THIM LAIA HNAI RENG*


Aug. 4, 2021 (Nilai zân) thuchah


_-PP Laldingngheta Sailo_


*Châng thlan:* 

I Lalte 20:23 _Tin, Suria lal hote chuan a hnênah, "An pathian hi tlâng pathian a ni a; chuvângin, keimahni aiin an chak a nih hi. Phaizâwlah bei tawh ila, anni ai chuan kan chak zâwk ngei ang e..."_


*Sawizauna:*

Lalte lehkhabu pahnih hi Samuela lehkhabu pahnihte nen hian a tira kutziak Hebrai Bible-ah chuan lehkhabu pakhat a ni a, remchan zâwkna avânga bu hniha ṭhen tâk an ni. 


Kan châng thlan bîk ah hian Israel ten Assuria nena an indona an hneh thu kan hmu a. Assuria lal Benhadada chuan Samari a hual a, Ahaba kha khatih laia Israel lal a ni. 


A vawikhat beihnaah chuan Samari khua chu a hual bet tlat a. Nimahsela, Lalpa ṭanpuinain Israel hote chuan lo hnehin an ûm tlân ta vek a. 


A vawihnihna atâna bei leh tura ruahmanna an siam chu "an pathian hi tlâng pathian a ni a; chuvangin phaizâwlah bei tawh ang" tih kha a ni.   An han inbei leh a, Lalpa ṭanpuinain an hneh leh tho a nih kha.


*"An pathian chu tlâng pathian a ni":*

He ṭawngkam hi Assuria lal hote ṭawngkam a nih avângin *pathian tihah hian 'p' hawrawp tê a rawn hmang a ni awm e.*  He ngaihdan, pathian bîl tê tê neia ngaihna hi khâng hunlai khawvêlah khân a lar hle a. Pathiante chuan thuneihna hmun bîk leh thiltihtheihna hmun bîk neiin an ngai a. Chuvângin, kha an inbeih hmasaknaa Israel ten hnehna an channa hmun kha tlâng ram a nih avângin suria lal chhiahhlawhte khân Israel te Pathian chu tlâng Pathian nia, phaizâwl Pathian ni ve lo turah an ngai a ni. 


He ngaihdan an neih avâng hian Suria ho chuan Israelte chu phaizâwla bei tawh turin ruahmanna an siam ta a ni. 


*Phaizâwl Pathian:*

Inbeihna an han hmachhawn leh a, Tlâng Pathian chauhva an ngaih Israel te Pathian chu Phaizâwlah pawh Pathian a lo ni tih a tak ngeia hmuhtira awmin suria hote chu Israelten an hneh nawn leh sak a ni.


Suria hote chuan *phaizâwl chu Pathian thlen thiltihtheihna lan phâk lohna hmun, Israelte Pathianin a thuneihna a hman theih lohna leh a mite a kalsan daihna hmun, Pathian mite dinhmun chhiat vek theihna hmunah an ngai a.* Nimahsela, an pathian neih ang mai maia anmahni hriatthiam dân tâwk leka thuneihna neia kan Pathian hi ngaih ve chi a ni lo tih a lang chiang ta hle a. Israelte tâna tlâng rama hnehna chan awlsam phah nâna tlâng Pathian chauh ni lovin an tâna hmun harsa leh an la hmelhriat ngai loh hmun, an tluk sual leh hmelmate chan ṭhatna hmun tura ngaih phaizâwl pawh chu an tân hnehna hlado an chhamna turin an Pathian chuan a lo ruahmansak vek a lo ni.


*Ni ênga Pathian, zan thim laia hnai rêng:*

Tun hnai chhova ka hla duh êm êm mai pakhat chu "Muanna Pathian" tih kha a ni a. Kan Pathian hi kan hlim lai te, kan chak lai te leh lawmna kan neih lai chauhva kan Pathian a ni lo va, kan hun thim lai ber, dinhmun hniam bera dinga kan inhriat lai pawha kan Pathian a ni tih hian min hneh ṭhin.


Mihring nunah hian thil chi hrang hrang a thleng ṭhin a. A chang chuan kan hlimin kan lawm a. Hringnun hi nuam veng vengin kan hre ṭhin a. Ringtute tân pawh kan nun tlâng sâng taka a awm lai chuan rawngbawl a nuamin Pathian fak leh chawimawi pawh kan harsat lo va, hnehna puan mai pawh a awlsam rêng a ni. Kan Pathian ṭhatzia sawi te hi a nuam a, a malsawmna pawh hi kan chhiar ru malh malh ṭhin a nih hi.


Nimahsela, he dinhmunah hian a din reng theih loh va. Mihring kan nih miau avângin dinhmun harsa tak tak kan tawh châng a lo awm a, thlemna leh fiahna tam tak hmachhawn tur a lo awm a, ringtute tâna rinna hloh phahna tur khawpa harsatna kan han tâwk a. Chutiang hunah erawh chuan "khawiah nge kan Pathian kha?" tih mai tur khawpin kan dinhmun a chau ta ṭhin a. He phaizâwl nunah hian a ni kan tlûka kan chauh tâk ṭhin ni. 


A ni rêng lah taka, phaizâwl nun hi chu a harsa a ni. Daniela ṭhiante pawhin Durra phaizâwl nun an han paltlang meuh chuan rawhtuina meipuia paih luh rawk rawk ngai khawpin Pathian hmel a lang har a. Lota te chhungkua pawhin phaizâwl an paltlang kim zo lo va, hlimna zoar pan tura an kal kawnga phaizawlah nu berin a peih lohsan ta a nih kha. 


Kan hringnunah hian chutianga phaizâwl, Lalpa hmel hmuh a har êm êmna hmun chu kan paltlang fo tawh leh kan la paltlang leh turah pawh hian a awm a. Natnain min han tlâk buak a, a hlawm hlawmin a lo kal ta emaw tih tura harsatna ten kan mimal nun leh chhungkua min han chim tak tak phei chuan khawnge kan Pathian kha a awm tâk tia inzawh mai a awl ṭhin asin. Hmelmapa hian he hmuna min hruai hi a tum ber a ni rêng a, phaizâwl, Pathian hmel hmuh a harsatna hmunah hian min dah a, beidawnga min siam hi a tum a ni.


Nimahsela, he hmun hi kan Pathian awm lohna hmun a ni lo va, fiahna paltlang tura indona kan hmachhawnna hmun leh a thiltihtheihna chiang lehzuala a tarlanna hmun  ni fo ṭhin. Daniela ṭhiante pawhin chu phaizâwl nun an han paltlang meuh chuan a harsa lai ber tur leh hrehawm lai ber tura ngaih meipuiah khân hrehawm engmah an va tuar ta lo zâwk a, Lota te pawhin nu ber an chânna phaizâwl aṭangin nunna zoar an thleng ta a nih kha. *Kan harsatna hmunah hian Lalpa a hla lo va, min kalsan ngai lo.*


*Tlîpna:*

Sâm ziaktu chuan *"Ani, thihna hlimkawr ruam zawh mah ila, thil ṭha lo rêng rêng ka hlau lovang, nang ka hnênah i awm si a,"* a ti a. Thihna hlimkawr ruam tih hi "Valley of the shadow of death" tih a ni a. He phaizâwl hmun kan sawi, ringtute chak lohna hmun nen hian sawi zawm ila a awm lo chuang lo ve. Mahse chu chak lohna ruam pawh chu zawh mahse Lalpa a hnena a awm tlat thu a piang a ni. 


Chhiatna ten min chim mup mup a, thihna ten thla an zâr a, natna leh lungngaihna ten min hual vel a. Mang a ang ṭhin a ni ti rawh u. Kan intihchak vena ṭhin kohhran ber pawhin biak in a khar avângin a huho chuan kan intichak tawn thei ta lo va. He'ng avângte hian tam tak chu kan chau zo va, kan ro zo va, kan vuai ta sul nite pawhin a hriat a ni. 


Nimahsela, kan hlim lai, kan lawm lai leh boruak ṭhat laia kan Pathian, malsawmna kan chhiar pawha a ṭha lam hlir nia kan hriat laia kan Pathian khân he hun harsaah hian min kalsan chuang lo. Amah kan rin theihna turin phaizawl hmunah hian ngawih a chuh rih a ni zâwk e. He phaizâwl hmuna amah thlang tlattute chu Durra phaizawla Amah vuan tlattute rawhtuina meia a lo nghak ang khân a aia harsa leh hei zet chu kan tân tawrh zawh rual a ni lovang tia kan huphurh em em hmunah hian min lo nghak a, malsawmna min pêk leh hi a duh a ni tuh i hre reng ang u.


Kan Panthian hi kan hringnun ni ên laia kan Pathian chauh ni lovin kan nunin zan thim a paltlang lai pawha Pathian a ni. Kan chhiat hlen hlauh hi a phal ngai lo ve.

Comments

Post a Comment

Popular posts from this blog

 *A INHRIATCHHUAH VE LEH* October 3, 2021 (Pathianni tûk) thuchah. _PP. Laldingngheta Sailo_ *Châng thlan:* _Luka 15:17-19  Tin, a inhriat chhuah veleh, ‘Ka pa hnena inhlawhfate chaw ei sen lohva nei an tam vei nen, kei lah chu hetah riltamin ka thi dawn si a!_  _Ka tho vang a, ka pa hnenah ka kal ang a, a hnenah, Ka pa, vana mi chungah leh nangma mithmuhin thil ka tisual e;_  _i fapaa vuah tlak ka ni ta lo ve; i hnena inhlawhfa pakhat angin mi siam ve rawh, ka ti ang,’ a ti a._ *Sawizauna:* Fapa tlanbo tehkhin thu hi beram bo leh duli bo chungchang tehkhin thu dawta Isua sawi a ni a. A pathum hian Pathian hmaa sima kirte chunga lâwmna a entir vek a ni. Tehkhin thua pa ber hi mi hausa tak mai, ram leh chhiahhlawh tam tak nei niin sawi a ni a. A fapate pawhin khawtlangah ngaihpawimawh hlawhin dinhmun ṭha takah an ding ngei ang tih a rinawm a. Nimahsela, chuta lungawi zo lo chuan fapa naupang zawk chuan a ro chanai lâin ram hla takah nuam chen turin a va kal ta a ni. A...
Read more
*Thlarau Thianghlim - Ringtute ralthuam* Têt lai/naupan lai khân kan indo lem/ in ṭheng ṭheng ṭhin a. Silai lem kan hmang a, kan in kâp ṭhin a. Kan kâ hmangin silai kah ri kan siam a, kan han inkâp tak tak chu kan tlu ve phak phak zel a, kan let ve tawp tawp zel ṭhin a nih kha. Nimahsela, silai tak ni lo na na na, a mu awm lo na na na chu kan tho leh mai a. Kan tlan leh zuai zuai ṭhin. Indona tak takah khatiang khan kal ta ila, khâng silai lem hmang khan va do ve ta ila, tumah kan that lovang a, kan hneh ngai lovang. Keimahni kan thi zawk hial ang. Ringtu nun chu indona a ni a, sual sipai nen ni tin kan indo ṭhin. Tam tak chuan naupan laia kan indolem ṭhin ang mai khan ralthuam lem tak tak kan hmang a, thirkawr lem kan ha a, hmanraw lem hlir kan hmangin kan inbel a. Indona mualah kan tlawm leh nge nge ṭhin. Biak Inah theihtawpa ṭhain kan inkhawm a, theihtawpa active-in Kohhranah kan che tla a, chûng chu ralthuam atan kan hmang ṭhin a. Mi beihnan kan hmang ṭhin a. A inhmang...
Read more
*Malsawmna danglam* Vawiin chu kan naute-in a  vawi thum nan vaccine a la a. A ṭap a, a khua te a sik a. Nausên mai a nih avangin ka lainat ngei mai. Hêng vaccine te hi nausên tan chuan a nâin an han chiu hian an ṭap vawn vawn zel a. Hmangaihtu tan chuan hmuh hrehawm tak a ni ṭhin. Tin, an khua a han sik a, hmangaihna leh khawngaihna nena en kan ni bawk a, hmuh an hrehawm ṭhin ngei mai.  Nimahsela, kha vaccine kha a nakin hun atan a ṭha dawn a. Natna chi hrang hrang lo do thei tura a taksa buatsaihna a nih avangin tunah hmangaihtu tan hmuh hrehawmin a tan nâ viau mahse, a khua hial tisik mahse kan tihtir lo thei lo a ni. A tun hun chauh ngaihtuahin khawngaih ta ila, nakinah natna hrang hrang lo thlengin a taksa hian a lo hmelhriat si loh chuan natna dotu a siam zung zung thei dawn si lova. A tan a ṭha dawn lo a ni. Chuvangin,tunah harsa mahse nakinah a tana ṭha zawk tur avangin kan laktir hram hram a ni. Hei hian kraws kawng min ngaihtuahtir a. "Tuarna pumpelh kawng zaw...
Read more