*NANG ERAWH CHU*


August 15, 2021 (Pathianni zing) thuchah


_-PP Laldingngheta Sailo_


*Châng thlan:*

2 Timothea 4:5 _Nang erawh chu engkimah fimkhur la, hrehawm tuar la, chanchin ṭha hriltu lam hna thawk la, i rawngbawlna kha hlen rawh._


*Sawizauna:*

Timothea hi rinnaa Paula fa an tih ṭhin a ni a. Lustra khuaa mi a ni a, a pa Jentail (Greek) mi niin, a nu Euniki erawh chu Juda mi a ni thung. A pi hi Loisi a ni bawk. Tuna kan innghahna châng awmna, a lehkhathawn pahnihna hi Rom khaw tân in aṭanga kum AD 66 na vela a thawn niin an ngai a ni. 


*Thuchah hnuhnung:*

Paula'n a hun hnuhnung lama he lehkha hi thawn a nih avâng leh Timothea chu kohhranho enkawl tura mawhphurhna a kova a tlâk tâk avânga fuihna hrang hrang a ziak a. Ṭhenkhat chuan a thurochhiah ang hialah an ngaihsak a ni. Mihringte hian kan hun hnuhnung, kan thih hnaih lamah hian thurochhiah kan sawi ṭhin a. Thih dawn hnaih têah phei chuan thu pawimawh tâwpkhâwk lo chu an sawi meuh lo. Thi tur thuchah chu ngaihpawimawh ṭhin a ni bawk. Chutiang chuan Paula hian a hun hnuhnung a ni tih hriain (2 Tim. 4:6ff) hêng thu pawimawh tak tak hi a chah a ni âwm mang e.


*Hun khirh takte a lo la thleng ang:*

Paula chuan ni hnuhnungahte chuan hun khirh takte a lo thlen tur thu a chah lawm lawm a. Chuta mite awm dan tur te pawh sawiin, fuihna thu a sawi a. Ni hnuhnungah chuan mahni inhmangaihtu te, tangka ngainatu te, Pathian sawichhetu te, etc... tiin mi chi hrang hrang an lo chhuah tur thu a sawi a. Thutak dodala a awm tur thu te, zirtirna dik tak aia a zawm nuam lam duh zawktu te, thutak aia thawnthu lam pana an la pen turte zawng zawng a sawi lâwk vek a. Chutiang hun khirh tak chu a lo la thlen dawn avangin, "nang erawh chu" tiin kawng tinrenga fimkhur tur leh a zirtirnate pawm tlat a, Pathian Lehkha thu a naupan têt ata a hriat tawhte chu vuan reng tur leh Chanchin ṭha hriltu ni a a rawngbawlna hlen turin a fuih a ni. 


*Hun khirh tak chu a lo thleng mêk e:* 

Paula'n hun khirh lo thlenf tur a sawite hi kan tawng chho mêk niin a lang a, Timothea a fuihna anga infuih leh a fuihnate zawm hi tunlai tingtute hian kan mamawh hle a ni. 


*Zirtirna dik ngai thei lo* kan tam ta viau niin a lang a. Thutak mila mahni lam insiamṭhat aiin kan nun leh ze mila thutak her rem kan tum ta emaw tih mai tur a ni ta. Kan nihna sawi fak fak leh kan tâna thu khal deuh ngaithla ṭha peih lo, chutiang thu chu mahni inenfiah nâna hman aia a sawitu mawhpuh a, kal sual leh Pathian thu la dik tâwk lova ngaih phêt tum kan tam ta emaw tih tur a ni ta. Kan ngaihthlak nuam tih zâwng lam bawh hun huna *zirtirtute mahni duhzawng lama khawm* kan tam ta riau mai. Hei hian hun khirh tak chu a lo thleng mêk tih a tilang chiang hle mai.


*Thutak aia thil dang dah pawimawhna* hian kan nun a luah khat zo ta vek emaw tih tur a ni bawk a. Pathian thu aiin thil dang kan hre thei ta zâwk viau nite pawhin a lang. Ringtu inti si a, Pathian thu aia khawvêl news leh thil dang hre thei fe fe, Pathian thu dawn thar nei lo khawvêl thu thar hre thei zet zet leh whatsapp group vel pawha post hmasa sa ni thei thung si kan ni ta fur mai a. Thutak laka beng chhu ngawng tlat, thil mai mai lama beng tivar lawi site kan ni ta hawlh mai. Ṭhenawmte dik lohna leh chet sualna hre rang thei viau si, Pathian pawlna sawi tur hre lawi si lo kan kat ta nuk mai.


*Dema anga khawvêl ngaina tlat, Pathian thutak aia materialism lam ngaina zâwk ringtu leh rawngbawltu inti kan tam ta.* Kohhran hruaitute, Upa leh rawngbawltu, Pastorte thleng hian Pathian thu aia kan thil neih chanchin sawi peih, Kohhran mite chanchin aia thil changkang deuh chanchin hre tam zâwk kan ni ṭhulh awm asin. Pathian thu changkanpui lova changkansan ta pawh kan tam awm e. Sakhuana hminga inla langsar, belhchian dawna duapkai leh fe fe si hi ringtu leh rawngbawltute ah hian kan tam ta viau awm e. Paula Dema a sawi ang chauha tunlai khawvêl ngainat avânga Pathian thu thlahthlam a, changkang taka Kristian, lem lawi site kan ni ta hlawm a. *Hun khirh tak chu a lo thleng mêk a, Ringtu tak takte tân fimkhur tak chunga chanchin ṭha hrilh a hun takzet a ni.* Kan thawk thei lo thuai ang e. 


*Nang erawh chu...:*

Paula'n Timothea hnena hetiang hun khirh tak hi a lo la thleng thuai dawn a, lo thleng pawh ni sela "Nang erawh chu..." tia a lo fuih ang hian _keini Lal Isua ringtu, he hun khirh tak tawng chho mêk, Pathian thutak aia materialism lama tlan tam tawh zâwkna, Pathian pawh a awm loh mai ring an pun zelna khawvêla cheng, chhungril takna aia a lang lama mawina thlir tawh zâwkna khawvêla cheng mêkte hian kawng engkima fimkhura Pathian hmangaihna chanchin ṭha kan nun leh thiltih, ṭawngka chhuak tinrenga puan chhuah hi kan tih tur a ni tih i theihnghilh lovang u._


Mite chuan khawvêl thilte chu lo thlang zâwk fo mahse, lem takin rawngte pawh lo bawl mahse, thutak hransan fo mahsela, ringtu inti reng chunga rinawm zo lova, dik lo tak taka thil a tih hunah pawh *Nehemia anga "Kei erawh chuan chutiang chu ka ti ve lo"* tia kan ṭan tlat theih a pawimawh hle a ni.


*Tlîpna:* 

Aw ringtu, *Nang erawh chuan Lalpa rawngbawltu i nih in hre reng la. He hun khirh tak lo thleng mêkah hian Pathian aia pawimawh zâwk rêng a awm lo tih hriain thutak (Pathian thu) lo buaipui zel ang che.* Hun khirh tak chu a lo thleng mêk e, kan thawk thei tawh lo vang.


Lalpan malsawm rawh se.

Comments

Post a Comment

Popular posts from this blog

 *A INHRIATCHHUAH VE LEH* October 3, 2021 (Pathianni tûk) thuchah. _PP. Laldingngheta Sailo_ *Châng thlan:* _Luka 15:17-19  Tin, a inhriat chhuah veleh, ‘Ka pa hnena inhlawhfate chaw ei sen lohva nei an tam vei nen, kei lah chu hetah riltamin ka thi dawn si a!_  _Ka tho vang a, ka pa hnenah ka kal ang a, a hnenah, Ka pa, vana mi chungah leh nangma mithmuhin thil ka tisual e;_  _i fapaa vuah tlak ka ni ta lo ve; i hnena inhlawhfa pakhat angin mi siam ve rawh, ka ti ang,’ a ti a._ *Sawizauna:* Fapa tlanbo tehkhin thu hi beram bo leh duli bo chungchang tehkhin thu dawta Isua sawi a ni a. A pathum hian Pathian hmaa sima kirte chunga lâwmna a entir vek a ni. Tehkhin thua pa ber hi mi hausa tak mai, ram leh chhiahhlawh tam tak nei niin sawi a ni a. A fapate pawhin khawtlangah ngaihpawimawh hlawhin dinhmun ṭha takah an ding ngei ang tih a rinawm a. Nimahsela, chuta lungawi zo lo chuan fapa naupang zawk chuan a ro chanai lâin ram hla takah nuam chen turin a va kal ta a ni. A...
Read more
*Thlarau Thianghlim - Ringtute ralthuam* Têt lai/naupan lai khân kan indo lem/ in ṭheng ṭheng ṭhin a. Silai lem kan hmang a, kan in kâp ṭhin a. Kan kâ hmangin silai kah ri kan siam a, kan han inkâp tak tak chu kan tlu ve phak phak zel a, kan let ve tawp tawp zel ṭhin a nih kha. Nimahsela, silai tak ni lo na na na, a mu awm lo na na na chu kan tho leh mai a. Kan tlan leh zuai zuai ṭhin. Indona tak takah khatiang khan kal ta ila, khâng silai lem hmang khan va do ve ta ila, tumah kan that lovang a, kan hneh ngai lovang. Keimahni kan thi zawk hial ang. Ringtu nun chu indona a ni a, sual sipai nen ni tin kan indo ṭhin. Tam tak chuan naupan laia kan indolem ṭhin ang mai khan ralthuam lem tak tak kan hmang a, thirkawr lem kan ha a, hmanraw lem hlir kan hmangin kan inbel a. Indona mualah kan tlawm leh nge nge ṭhin. Biak Inah theihtawpa ṭhain kan inkhawm a, theihtawpa active-in Kohhranah kan che tla a, chûng chu ralthuam atan kan hmang ṭhin a. Mi beihnan kan hmang ṭhin a. A inhmang...
Read more
*Malsawmna danglam* Vawiin chu kan naute-in a  vawi thum nan vaccine a la a. A ṭap a, a khua te a sik a. Nausên mai a nih avangin ka lainat ngei mai. Hêng vaccine te hi nausên tan chuan a nâin an han chiu hian an ṭap vawn vawn zel a. Hmangaihtu tan chuan hmuh hrehawm tak a ni ṭhin. Tin, an khua a han sik a, hmangaihna leh khawngaihna nena en kan ni bawk a, hmuh an hrehawm ṭhin ngei mai.  Nimahsela, kha vaccine kha a nakin hun atan a ṭha dawn a. Natna chi hrang hrang lo do thei tura a taksa buatsaihna a nih avangin tunah hmangaihtu tan hmuh hrehawmin a tan nâ viau mahse, a khua hial tisik mahse kan tihtir lo thei lo a ni. A tun hun chauh ngaihtuahin khawngaih ta ila, nakinah natna hrang hrang lo thlengin a taksa hian a lo hmelhriat si loh chuan natna dotu a siam zung zung thei dawn si lova. A tan a ṭha dawn lo a ni. Chuvangin,tunah harsa mahse nakinah a tana ṭha zawk tur avangin kan laktir hram hram a ni. Hei hian kraws kawng min ngaihtuahtir a. "Tuarna pumpelh kawng zaw...
Read more