*ISUA DEK NUN*

August 1, 2021 (Pathianni zân) thuchah

_-PP Laldingngheta Sailo_

*Châng thlan:* 

Luka 8:45-46   _Tin, Isuan, "Mi dek kha tunge ni?" a ti a. Tin, "Kei chu ka ni lo," an ti theuh va, Petera leh a thianten, "Zirtirtu, mipui hovin an nek huai huai chia, an chil huai huai che alawm," an ti a._ 

_Nimahsela Isuan, "Tuin emaw zawng mi dek a ni, thiltihtheihna ka chhung ata a chhuak tih ka hre nghe nghe asin," a ti a._

*Sawizauna:*

He kan châng thlan lai hi kan hriat hnû leh kan hriat lâr em em châng niin ka ring a. Isua'n Galili bial a fan laia Jaira fanu thi a kaihthawh dawna a panna kawnga thil thleng kha a ni a. Hmeichhe pakhat, kum sawm leh kum hnih thi pûta dam lo tawh a tihdam chungchang kha a ni.

He hmeichhia hi Jentail mi, Kaisara Philippi mi niin a lang a. He hmeichhia hi Juda sakhaw dânah chuan bawlhhlawh a ni a (Lev. 15:19-33). A thi pût avâng khân mipui zinga awm ve lo tur a ni. Chumi avâng chuan langsâr takin Isua kha a zui ve ngam lo va, mipui zingah a rûkin a lo kal ve a ni. Chuvang chuan Isuan a dektu a zawh pawh khân a inpuang mai ngam lo a ni. 

Doctor hnênah a inentir ṭhin a, a neih zâwng zâwng a khawhral hnuah pawh a dam thei si lo va. A mangang tawh lutuk chuan a nihna zâwng zâwng hre chungin, mi bawlhhlawh leh mite ten a nih inhre chungin a rûkin "a puan hmawr chauh pawh dek ila ka dam mahna" tia rinna tak tak nen Isua a va dek a. A dam ta rêng a nih kha. 

*Isua'n a hria:*

Isua khân thilmak tam tak a ti a. Dam lote a tidam a, mitthite a kaitho va, ramhuaite mi kawchhung ata a hnawh chhuahsak a. Chûng thil avâng chuan mi tam takin an zui huai huai a. Hemi ṭum pawh hian mi tam takin an zui ni ngei tur a ni. Isua'n "Tunge mi dek kha?" tia a zawh pawhin zirtirte khân "Mipuiin an nêk huai huai chia, an chîl huai huai che alâwm" tiin mi tam takin an dek a ni tih an hrilh a, zawhna âtthlâk takah an ngaihsak a. Nimahsela, khâng a nêk huai huaitu zinga pakhat khân a thiltihtheihna a dek chhuak a, a nêktu zingah kha nêktu pakhat kha a hre bîk tlat a ni. A thiltihtheihna dek chhuak khawpin Isuaah a lo innghat a, a lo ring bîk a nih chu. Midangte kha chuan a thilmak tih hmuh beisei avanga zui ve chauh an ni awm e. Thiltihtheihna chang ve pha si lova Isua hnaih tak taka kal an lo ni lek awm asin.

*Kan zir tur:*

He thil thleng aṭang hian keini Isua zuitu leh ringtu intite hian zir tur leh mahni inenlêtna tur ṭha tak kan neiin ka hria. Point hnih lekin han sawi ila.

A pakhatnaah chuan *Isua hriat leh hriat loh rawngbawltu* kan awm dawn. Zuitu leh nêka dektu tam tak zinga Isua'n hriat bîk leh a thiltihtheihna nêk chhuak thei bîk dektu a hria ang khân a hnung kan zuina leh a rawngbawl ve kan intihnaah hian Isua hriat leh hriat loh hi a lo awm thei viau mai dawn a lo ni. 

Isuaa innghat tak tak leh tak tak lo chu Isua hian a lo hre khawp mai. Matthaia 7 kan chhiar chuan khawvêl tâwpa rorêlna huna Pathian mi hriat leh hriat loh thliar an nih tur thu kan hmu a. Chumi hunah chuan tam tak chuan Isua rawngbawl ve nia an lo inhriatna (ramhuai hnawh chhuah te, sermon sawi ṭhin te, thilmak lo tih ve te  thlengin) hmanga thiam chan an tum ang a. Mahse khâng lo ti ṭhin tam tak kha Isua'n ka hre ngai lova che u" tia a la chhan tur thu kan hmu. Isua hriat ngai loh rawngbawltu, ṭhahnemngai leh bei nasa em emte zingah pawh hian a lo awm theih dawn hle a lo ni. 

Kan rawngbawlnaah hian Isua langsar ber sela, Isua pawimawh ber sela, Amahah innghat tak tak ila, chu chu Isua min hriat theihna tur chu a ni. Hmeichhia khân a lo inhnem ve ṭhinna leh innghahna dang a lo neih ṭhin zawng zawng kha a beidawnpui tawhin innghahna tlâk an lo nih lohzia a hria a. Isua chauh beiseiin amahah a innghat pumhlum vek a. Zah leh hlauh pawh dâwn lova a va dehna khâ Isuan a lo hre ta chat a ni. Khatiang chiah khân keimahni leh kan hlimpui thil tam tak te, rawngbawlna pawh mahni mawina atâna kan lo hman ṭhinte leh amah Isua aia thilmak leh ropui lâwm zâwk ṭhin kan nihna te kalsana Isua hnung kan zui a, rinna tak tak nena amah dektu kan nih a pawimawh hle a ni.

A pahnihnaah chuan *Isuan mi tumah a thliar lo a ni* tih he lai thu aṭang hian a chiang hle. Hmeichhia kha Juda dâna bawlhhlawh leh tenawm, mite zinga awm thiang lo mah nise Isua khân a zuitute dang zawng zawng theihnghilhin kha hmeichhiain amah a beiseina leh mamawhna kha a ngaihsak a, hmaichhanah a bia a. Midang an awm ve tih hriat miah lohvin an pahnih chauh khân an awm ta emaw tih turin Isua khân a be ta a nih kha. A thiltihtheihna pawh a chantir ta ngei bawk a.

Mi sual leh tenawm, tute mahin an rin loh leh ngaihsak loh nia kan inngaih lai te, rethei bik riauva inhria leh mi hmuhsit leh ngaihsan loh nia kan inhriat ṭhin lai pawhin Amah kan beiseia kan innghah tak tak chuan Isua hian min lo hnar ngai lo mai ni lovin lâwm takin min ngaihsak ṭhin a ni. Ruihhlo avânga lo buai ru em em, eirûk ṭhin avânga lo buai ru ṭhin, mipat hmeichhiatna hman khawloh avânga zak taka lo awm ru ṭhin leh mahni inthiam loh rukna leh midangten hria se an nuihzat leh dem kan hlawh maina tur thil tam tak lo ti ṭhinte pawh ni mah ila Isua chuan chûng zâwng zâwng nen chuan min pawm hreh lo va, min silfai a duh ngawih ngawih zâwk a. Mamawh nia kan inhriata kan pan phawt chuan kan lam a lo hawi vat ṭhin a ni. 

*Tlîpna:*

Kan sawi tâk thilte aṭang hian mahni inen ta ila. Isua hriat ngai loh hian a rawng hi ka lo bawl reng em. Amah hnaih hlea ka inhriat lai leh mite pawhin rawngbawltu ṭha tak, Kristian ṭha taka min ngaih lai hian Isua dêk che zo lo, Isua hriat tak tak si loh hian ka lo vir buai ve êm êm em tih hi inzâwt ila. Amaha innghat tak takte lo chu Isua hian a hre tak tak lo va, a rawngbawlah min ngai lem lo tih hriain amaha innghat chunga a hnung zui i tum tlat ang u.

Isua hian duhsak bîk, ngaihsak bîk a nei lo va. Engvang pawha mite hlamchhiah, ei loh leh nuihzat rûk ṭhin dinhmuna lo ding tawhte pawh min hnungchhawn mai lovin a hma lam ngei min chhawna min hawi ṭhintu a ni tih hriain i pan hreh lovang u.