*ISUA CHU LAL A NI*


August 8, 2021 (Pathianni zân) thuchah


_-PP Laldingngheta Sailo_


*Châng thlan:*

Johana 18:37  _Tin, Pilatan a hnenah, “Chu, lal i ni elo?” a ti a. Isuan, “Ni e, lal ka ni asin. Thutak hriattir hi ka pian chhan leh khawvela ka rawn kal chhan a ni. Tupawh thutaka mi apiangin ka thu an pawm thin,” a ti a._


*Sawihawnna:*

Kum tina Kristianten Lal Isua Lalna kan puan chhuah ṭhinna nî pakhat chu Tumkau Pathianni (Palm Sunday) hi a ni a. He nî a lo thlen hian kum tinin Lal a nihna anga ropui taka Isua Jerusalema a luh thu hi kan sawiin kan aupui a, kan fakin kan chawimawi bawk ṭhin a ni. Lal Isua chawimawi nan naupang leh puitling pawh a remchang apiangin khawlaiah Lal Isua lal a nihna puangchhuakin chawimawina hla kan au chhuahpui ṭhin a ni.


*Lalin chawimawi a hlawh lo:* Isua chu Lal a ni tih kan hria a. Rom sipaiten an man a, Pilata hmaa an hruai khân Pilata chuan a lo zâwt vel a. Judate lal i ni em ni tih te, lal i ni elo ti tein zawhna a lo siam a. Chuta Isua chhânna chu "Ni e, Lal ka ni asin" tih hi a ni. Isua kha lal a ni tih a inpuang a nih kha.


Nimahsela, Lal a nih anga chawimawina erawh a dawng lo hle mai a, khawvêla rawng a bawl chhung khân mihringte chawimawina vawikhat a dawng ve a. Chu chu *'ropui taka Jerusalema a luh* chauh kha a ni. Lal a ni a, nimahsela Lal a nih kha khawvêl khân a hre lo va. Lal a nihna angin chawimawi a ni ngai lo va. Kum 30 emaw awrh chauh khawvêlah a awm a. Kum 3 emaw vel rawng a bawl a. Khawvêla a cham hun kum 30 chuang emaw chhung khân vawikhat chiah Lal a nihna avanga chawimawi a hlawh a ni. Lal ve ta si chu chawimawina a dawng lo hle mai.


Khawvêl lalte chuan an mite aṭangin zahna leh chawimawina an dawng awl lo va, zahna chibai an inbuk ṭhak ṭhak reng mai a ni ngai a. Kan Lal Isua ve erawh zawng, chawimawina a va dawng tlem tehlul em.


*Kan lal hi kan chawimawi em?*

Isua hringchan laia lal a nihna anga an chawimawi tawk lohzia kan sawi ṭhin a. Nimahsela, A khawvêl hun hman chhung chauh kha ni lovin tuna keini a zuitute pawh hian kan chawimawi tawk zo lo hle tho lo maw? 


A hun laia mite kha Judate an ni a, an sakhaw dan avang khan Isua kha Lalah an pawm chiah lo va, a âwm viauin a la hriatsak theih zawk a. Keini Isua hi Lal a ni tih hretute zawk hian Lal a nihna ang hian kan chawimawi  ṭhin chiah em le? Chawimawina tih hian eng emaw hlan leh Jerusalema a luh nia kawng an zawhpui ang khan kan ti vek thei tawh kher lo ang. Nimahsela, Lal chuan a mite hnenah thu a nei a, a miten a thu an zawm ṭhat hian an lal chu an chawimawi a ni mai. Kan nun hmanga amah kan chawimawina hi Isua pawhin a duh ber a ni ngei ang.


Vawiinah hian kan ngaihtuahna ṭheuh seng thar leh ila ka duh hle mai. Tunlaiin Covid-19 boruak leng velah leh tun BJP sorkar hnuah Kristiante nekchepna lam hawia kan ni pawimawh taka thil eng emaw tih tur ruahmanna a lo awm ṭhin a. Hêngte hi kan duh lovin tam tak chuan Krista lalna ram nekchepnaah kan ngai ṭhin a nih hi. Kan thin pawh a rim hle zel a, a dik a ni. Krista lalram ṭhiaha a awm hi kan hlau a ni ve mai.


Nimahsela, ka sawi duh zawk tak chu Kristian (Krista zuitu) intite nunah zawk hian Krista hi a lal tak tak em tih hi a ni. Kristian ni lo, Krista zuitu ni lo chuan a chawimawi lo vang a, a lalram zauh pawh a hlau hle tur a ni. Nimahsela, keini Amah (Isua) zuitu intite nunah hian Pathian ram a thleng mawhin a zau mawh em em a. A Lalna hi a lang hlei thei lo ṭhin hi a va buaithlak ṭhin em.


Kan thinlungah hian khawvêl thil tam tak ten Krista lalna hi an chhuh a, Krista zuitu inti si hian a lalna erawh a lang tlem hle si a nih hi. He nun tak mai hi vawiina Krista lalna leh chawimawina kan hlan nîah hian hlan thar leh ila, thlak danglam ila. Kan zui Lal Isua hi lo lal thar leh sela a va duhawm êm.


*Isua chu lal a ni:* 

Isua hi lal a ni tih hi kan nun hmang hian i puang chhuak dawn teh ang u.  *Lal chu a lalna hmunah chuan a thu ber a, a khua leh tuite chuan a thu an zawmin an ngaichang ṭhin.* Keini hi van khua leh tui nihna neitu kan ni a, chuta roreltu chu kan Lal Isua hi a ni. Lalin a khua leh tuia thuneihna nena ro a rel ang hian Isua hian a duh danin (keimahni duh dan ni lo vin) ro rel rawh se. Isua'n a thua ro a rel theihna hmunah chuan chawimawi a hlawh ang. Chu ngei chu a tan Lal ram a ni ang.


*Tlîpna:*

Kan ni tin nunah, midangte nen kan inkarah te, kohhrana rawng ka bawlnaah te, chhungkua kan inenkawlna kawngah te, sorkar hna leh ni tina eizawnna ka dapna kawngah te hian Isua avangin rinawm leh dik takin, tlawmna, remna leh huaisenna te nen thawk ṭhin ila zawng Isua chawimawi nana ka kâ ka àn fo leh chawimawi tum chawp ngai lo hian Isua hi ni tinin kan nun hmang hian chawimawi a ni ang a, Isua chu lal a nihzia kan puang chhuak reng ni mai tur.


Tun aṭang hian Isua lalna nun, Isua lalna thinlung neitu nih i tum ṭheuh ang u.

Comments

Post a Comment

Popular posts from this blog

 *A INHRIATCHHUAH VE LEH* October 3, 2021 (Pathianni tûk) thuchah. _PP. Laldingngheta Sailo_ *Châng thlan:* _Luka 15:17-19  Tin, a inhriat chhuah veleh, ‘Ka pa hnena inhlawhfate chaw ei sen lohva nei an tam vei nen, kei lah chu hetah riltamin ka thi dawn si a!_  _Ka tho vang a, ka pa hnenah ka kal ang a, a hnenah, Ka pa, vana mi chungah leh nangma mithmuhin thil ka tisual e;_  _i fapaa vuah tlak ka ni ta lo ve; i hnena inhlawhfa pakhat angin mi siam ve rawh, ka ti ang,’ a ti a._ *Sawizauna:* Fapa tlanbo tehkhin thu hi beram bo leh duli bo chungchang tehkhin thu dawta Isua sawi a ni a. A pathum hian Pathian hmaa sima kirte chunga lâwmna a entir vek a ni. Tehkhin thua pa ber hi mi hausa tak mai, ram leh chhiahhlawh tam tak nei niin sawi a ni a. A fapate pawhin khawtlangah ngaihpawimawh hlawhin dinhmun ṭha takah an ding ngei ang tih a rinawm a. Nimahsela, chuta lungawi zo lo chuan fapa naupang zawk chuan a ro chanai lâin ram hla takah nuam chen turin a va kal ta a ni. A...
Read more
*Thlarau Thianghlim - Ringtute ralthuam* Têt lai/naupan lai khân kan indo lem/ in ṭheng ṭheng ṭhin a. Silai lem kan hmang a, kan in kâp ṭhin a. Kan kâ hmangin silai kah ri kan siam a, kan han inkâp tak tak chu kan tlu ve phak phak zel a, kan let ve tawp tawp zel ṭhin a nih kha. Nimahsela, silai tak ni lo na na na, a mu awm lo na na na chu kan tho leh mai a. Kan tlan leh zuai zuai ṭhin. Indona tak takah khatiang khan kal ta ila, khâng silai lem hmang khan va do ve ta ila, tumah kan that lovang a, kan hneh ngai lovang. Keimahni kan thi zawk hial ang. Ringtu nun chu indona a ni a, sual sipai nen ni tin kan indo ṭhin. Tam tak chuan naupan laia kan indolem ṭhin ang mai khan ralthuam lem tak tak kan hmang a, thirkawr lem kan ha a, hmanraw lem hlir kan hmangin kan inbel a. Indona mualah kan tlawm leh nge nge ṭhin. Biak Inah theihtawpa ṭhain kan inkhawm a, theihtawpa active-in Kohhranah kan che tla a, chûng chu ralthuam atan kan hmang ṭhin a. Mi beihnan kan hmang ṭhin a. A inhmang...
Read more
*Malsawmna danglam* Vawiin chu kan naute-in a  vawi thum nan vaccine a la a. A ṭap a, a khua te a sik a. Nausên mai a nih avangin ka lainat ngei mai. Hêng vaccine te hi nausên tan chuan a nâin an han chiu hian an ṭap vawn vawn zel a. Hmangaihtu tan chuan hmuh hrehawm tak a ni ṭhin. Tin, an khua a han sik a, hmangaihna leh khawngaihna nena en kan ni bawk a, hmuh an hrehawm ṭhin ngei mai.  Nimahsela, kha vaccine kha a nakin hun atan a ṭha dawn a. Natna chi hrang hrang lo do thei tura a taksa buatsaihna a nih avangin tunah hmangaihtu tan hmuh hrehawmin a tan nâ viau mahse, a khua hial tisik mahse kan tihtir lo thei lo a ni. A tun hun chauh ngaihtuahin khawngaih ta ila, nakinah natna hrang hrang lo thlengin a taksa hian a lo hmelhriat si loh chuan natna dotu a siam zung zung thei dawn si lova. A tan a ṭha dawn lo a ni. Chuvangin,tunah harsa mahse nakinah a tana ṭha zawk tur avangin kan laktir hram hram a ni. Hei hian kraws kawng min ngaihtuahtir a. "Tuarna pumpelh kawng zaw...
Read more