*LALPA PHÛT*


July 31, 2021 (Inrinni zân) thuchah


_-PP Laldingngheta Sailo_


*Châng thlan:*

Mika 6:8   _Aw mihring, tha chu a entîr tawh che a ni; LALPAN a phût che chu eng nge ni? Dik taka tih leh khawngaihna ngainat leh i pathian nena thuhnuairawlh taka lendun a ni lo vem ni?_


*Sawizauna:* 

Mika hi kum zabi pariatna huna zawlnei a ni a. A hming awmzia hi "Yahweh ang hi tunge awm?" (Who is like Yahweh) tih a ni. 


A rawngbawl hun lai hi hun khirh tak a ni a. Retheite rahbehna leh tihduhdahna a hluarin milian leh thiltithei hote an inlek hle a. Dik lo taka mi hausa hovin mi rethei hote an hnuaichhiah lai a ni. Lal chhungkua an ni emaw, sawrkar milian leh sumdawng hausa, sakhaw puithiam chenin mahni hmasial takin hlawkna an um a, an theih apiang an ei a, chin lem an nei lo. Mipuite leh rorêltute nun dan chuan Pathian pawi a khawih nasain an sakhaw thiltih leh rawngbawlnate chuan Pathian a ti lawm lo nasa hle a ni. 


*Pathianin a phût pathumte:*

Hetianga hun harsa leh khirh tak an tawn a, Pathian pawi nasa tak an khawih avâng hian a mite hnena Lalpa phût, ti ngei ngei tura a duh leh a beiseite chu kawng thumin a rawn sawi a. A mal tê têin sawi dawn ila.


*Dik taka tih:*

Mika hun lai khân mi liante leh mi thiltitheite an pawngin an inlek hle mai a. Mi hnuaihnungte hmuhsit leh rahbehin an awm thung. Dam khaw chhuahna tura an beihnaah khân an hun ṭha neih leh beiseina an neih kha a inthlau hle a. Mi rethei leh hnuaihnungte chuan _chance_ an nei mang lo va, rethei chu retheih zual zel, hausa chu hausak belh zel dinhmunah khân an ding a ni ber mai.


Kan tunlai khawvêl pawh hi chutiang chu a ni deuh tawh a. Retheite tâna thawh chhuah leh harsa tawh em em turin kan society kalphung leh kan sawrkar system hi a dik tâwk tawh lo niin a lang. Duhsaktu neih ṭhat te, sum leh pai ngah te, lansarh te kawng engkimah a lo ngai ta a. *Hausa tur chuan hausak hmasak phawt a ngai* tih fiamthu kha a tak takin kan tawng mêk a ni. 


Hetah hian Kristian, Lal Isua zuitu intite hi chuan Kristian value kan tih zinga pakhat *Dikna* hmanga kan nun kan hman chhoh a ngai ta. Mi lian an nih avâng te, mi langsar leh thiltithei deuh, sum leh paia min vawm thei deuh an nih avânga duhsakna dik lo lantir te, chanvo ṭha chantirte hi kan tih loh tawp tur a ni tih hria ila. Retheite mei êng ena an ṭhut lai hian dik lo taka hausak bîk hi a rem lo a ni tih hria ila, Lalpan min phût tlat angin dik taka nun i tum ang u. 


Political party lama hruaitu, kohhran lama hruaitu, NGO leh khawtlanga hruaitute thleng hian mahni tâwka kan hlenchhuah tur mawhphurhna pawimawh tak tak kan nei ṭheuh mai a, chu tah chuan dik takin ka thawk em tih hi in en nân i hmang ang u. Khawtlâng sum tur eng ti angin nge ka chai kual a, mi rethei chanai laksak ka nei ṭhin em tih te, party mi leh sa hleihluak tak leh dik lo takin ka lo duhsak em, ka chhung leh khatte dik lo takin ka lo duhsak em, sum leh pai ther hlo ilo ka lo la ṭhin em tih zawng zawng hi inzâwt nawn ṭhin ila a va ṭha êm. Kristian chu dik takin nun i tum teh ang u. 


*Khawngaihna ngainat:*

Lalpan min phût dang leh pakhat chu 'khawngaihna ngainat' a ni a. Hebrai ṭawng chuan _hesed_ (Khesed tia lam tur) a ni a, chu chu kan tâna Pathian khawngaihna leh lainatna lo luang chhuak sawina a ni. Pathian khawngaihnain min hneh vek a, chu khawngaihna kan dawn ang thova midang, mamawhtute khawngaihna leh lainatna neih chu a ni. Khatih hun lai khân mi rethei leh hnuaihnung zawkte rahbehna leh ngaihsak lohna a nasa hle kan tih tawh kha. Chumi kârah chuan hei hi a chah a ni. 


Hei hi thil awlsam tak chu a ni lo phawt mai. Kan vela mite, min mamawhtute, keini aia harsa leh rethei zâwk te, ni tin mamawh pawh phuhru zo mang lo leh, kan tunlai boruakah ngat phei chuan an tam leh zual ngei ang, chûng mite tâna khawngaihna va lantir kha he lai thuin a sawi ber chu a ni. Pathianin a khawngaih êm avângin a hnam thlante khân a lakah thil tisual fo mahsela a khawngaihna a lantir leh ṭhin a, a ngaidama mal a sawm leh ṭhin ang khân he khawngaihna hi lo hmang ve rawh u a ti a ni. 


*Pathian nena thuhnuairawlh taka lendun:*

A pathumnaah chuan Pathian nêna lendun a ni. Pathian nêna inkawma lengdun ṭhin nunah chuan a hmasa pahnihte khi a lang chhuak ṭhin. Chuvangin, he point hi kan tih zâwng zâwng innghahna a ni ti ila kan sawi sual lo vang. Pathian nêna lengduna inrem taka inkawm ṭhinte nunah hian dik lohna te, midangte care theih lohnate hi a awm thei lo a ni. 


A sap ṭawngah chuan "To walk humbly with God" tih a ni a, chumi awmzia ber chu Pathian nêna kal dun zêlna tihna a ni. Pathian a tel ve zêlna nun a ni. Kan hringnuna Pathian a tel ve zelnaah chuan a duh loh zâwng thil a leng ve lo. Pathian nêna tihdun theih loh thil hrang hrangte hian hmun a chan ve loh avângin ni tina Lalpa nêna kan hringnun zinkawng kan chhiar duna kan zawh dun ṭhin hi a pawimawh êm êm a ni. 


Isua a tel ve zêlna nunah chuan diknain ro a rêl a, midangte tâna malsawmna nih dan tur a ngaihtuah a, hringnun hi a thlir thiam ṭhin a ni. Chuvangin, Lalpa nêna lendun hi kan thlang fo tur a ni.


Lalpan malsawm rawh se.

Comments

Post a Comment

Popular posts from this blog

 *A INHRIATCHHUAH VE LEH* October 3, 2021 (Pathianni tûk) thuchah. _PP. Laldingngheta Sailo_ *Châng thlan:* _Luka 15:17-19  Tin, a inhriat chhuah veleh, ‘Ka pa hnena inhlawhfate chaw ei sen lohva nei an tam vei nen, kei lah chu hetah riltamin ka thi dawn si a!_  _Ka tho vang a, ka pa hnenah ka kal ang a, a hnenah, Ka pa, vana mi chungah leh nangma mithmuhin thil ka tisual e;_  _i fapaa vuah tlak ka ni ta lo ve; i hnena inhlawhfa pakhat angin mi siam ve rawh, ka ti ang,’ a ti a._ *Sawizauna:* Fapa tlanbo tehkhin thu hi beram bo leh duli bo chungchang tehkhin thu dawta Isua sawi a ni a. A pathum hian Pathian hmaa sima kirte chunga lâwmna a entir vek a ni. Tehkhin thua pa ber hi mi hausa tak mai, ram leh chhiahhlawh tam tak nei niin sawi a ni a. A fapate pawhin khawtlangah ngaihpawimawh hlawhin dinhmun ṭha takah an ding ngei ang tih a rinawm a. Nimahsela, chuta lungawi zo lo chuan fapa naupang zawk chuan a ro chanai lâin ram hla takah nuam chen turin a va kal ta a ni. A...
Read more
*Thlarau Thianghlim - Ringtute ralthuam* Têt lai/naupan lai khân kan indo lem/ in ṭheng ṭheng ṭhin a. Silai lem kan hmang a, kan in kâp ṭhin a. Kan kâ hmangin silai kah ri kan siam a, kan han inkâp tak tak chu kan tlu ve phak phak zel a, kan let ve tawp tawp zel ṭhin a nih kha. Nimahsela, silai tak ni lo na na na, a mu awm lo na na na chu kan tho leh mai a. Kan tlan leh zuai zuai ṭhin. Indona tak takah khatiang khan kal ta ila, khâng silai lem hmang khan va do ve ta ila, tumah kan that lovang a, kan hneh ngai lovang. Keimahni kan thi zawk hial ang. Ringtu nun chu indona a ni a, sual sipai nen ni tin kan indo ṭhin. Tam tak chuan naupan laia kan indolem ṭhin ang mai khan ralthuam lem tak tak kan hmang a, thirkawr lem kan ha a, hmanraw lem hlir kan hmangin kan inbel a. Indona mualah kan tlawm leh nge nge ṭhin. Biak Inah theihtawpa ṭhain kan inkhawm a, theihtawpa active-in Kohhranah kan che tla a, chûng chu ralthuam atan kan hmang ṭhin a. Mi beihnan kan hmang ṭhin a. A inhmang...
Read more
*Malsawmna danglam* Vawiin chu kan naute-in a  vawi thum nan vaccine a la a. A ṭap a, a khua te a sik a. Nausên mai a nih avangin ka lainat ngei mai. Hêng vaccine te hi nausên tan chuan a nâin an han chiu hian an ṭap vawn vawn zel a. Hmangaihtu tan chuan hmuh hrehawm tak a ni ṭhin. Tin, an khua a han sik a, hmangaihna leh khawngaihna nena en kan ni bawk a, hmuh an hrehawm ṭhin ngei mai.  Nimahsela, kha vaccine kha a nakin hun atan a ṭha dawn a. Natna chi hrang hrang lo do thei tura a taksa buatsaihna a nih avangin tunah hmangaihtu tan hmuh hrehawmin a tan nâ viau mahse, a khua hial tisik mahse kan tihtir lo thei lo a ni. A tun hun chauh ngaihtuahin khawngaih ta ila, nakinah natna hrang hrang lo thlengin a taksa hian a lo hmelhriat si loh chuan natna dotu a siam zung zung thei dawn si lova. A tan a ṭha dawn lo a ni. Chuvangin,tunah harsa mahse nakinah a tana ṭha zawk tur avangin kan laktir hram hram a ni. Hei hian kraws kawng min ngaihtuahtir a. "Tuarna pumpelh kawng zaw...
Read more