*HUN LAWMAWM, CHHANDAMNA NI*


July 4, 2021 (Pathianni) thuchah.


_-PP Laldingngheta Sailo_


*Châng thlan:*

II Korinth 6:2  

_*“Hun lawmawmah ka ngaithla che a, Chhandamna ni-ah ka tanpui che,” a ti si a. Ngai teh u, tun hi hun lawmawm chu a ni a; ngai teh u, tun hi chhandamna ni chu a ni.*_


*Thuhma:*

Vawiin hi BCM Mission Sunday a ni a. Lal Isua thupêk ropui, Chanchin Ṭha hrilh pawimawhzia Kohhran hote inzirtirna tura ruahman a ni. Kumina he nî thupuiah hian BCM chuan "Tun hi hun lawmawm, chhandamna ni a ni" tih hi a thlang a ni. 


*Sawizauna:*

Korinth lehkhathawn pahnihna hi lehkhathawn pakhatna ziah hnu kum khat pawh a liam hmaa Makedonia aṭanga thawn niin a lang a. Mi tam ber chuan AD 57-naa ziah niin an ngai. 


He lehkhathawn hi a mimal thil em em a, hei hi a ngainatawmna a ni. A ziaktu Paula rilru zuk hriatthiampuia zuk hmuhpui theih tur khawpin a ziak a ni. 


*Krista aia palai:*

Kan châng innghahna thu hma lam hlek aṭang hian Paula hian ringtute chu Krista aia palai hna thawktu kan nihzia a tarlang a. Palai chuan a tihtur chu remna siam a ni. Lei leh vân inrem tawh lo inremtir leh turin vân chuan palai Isua Krista a rawn tir a. Chu palai hna chu ringtute thawh chhunzawm turin kan kovah nghah a ni tiin a sawi a. Chutah chuan "Pathian nen lo inrem rawh u" tiin mite chu a Pathian nena inrem a, Chhandamna chang ngei turin a ngen hial a ni. 


Tichuan, chu khawngaih rawngbawlna, palai hna thawk chhunzawm zel turin *"tun"* hi hun lawmawm leh ṭha ber a ni tiin a sawi a ni. 


*Tun hi hun lawmawm, chhandamna ni a ni:*

Kan khawvêl hun thlir hian hun hmawr tawng, ral lek lek tawh a nih hi a hriat theih a. Khawvêl tawp dawn hnaiha thil thleng tura kan Pathian thuin a sawi hi a thleng tam tawh em em a ni. Hri a lêng a, chhiatna nasa tak tak a thleng a, lir a nghing a, indo thu thang kan hre chamchî tawh a nih hi. Chu mai bâkah kan nunna chungah hian thu kan nei lo em em a, kan hma lam hun minute khat tê pawh hi sawi lâwk theih leh kan nun pawhsei theihna hi kan nei lo. 


Chuti chunga "tun hi hun lawmawm a ni" lo tih hi eng nge a awmzia ni ang? Kan khawvêl boruak thlirin thu lawmawm lam a vâng viau kan ti mai thei. Nimahsela, kan chan ṭheuh, mimal, chhungkua leh khawtlang ang zawng pawhin han chhût chiang ila lawmna tur hi a tam em em mai a ni. Tin, Lalpan min la ngaithla duh a, kan ṭawngṭaina a la chhâng duh a, kan dilnate min tihhlawhtlinsak ṭhin tluka lawmawm hi a awm lo. Hun harsa tak kâra Lalpa ṭhatna zâr kan zo hi chhût ila lawmna tur a tam a ni. 


An hausaknain a chhan zawh loh mi hausa tam tak an thi a, rilrua mangang em em, beisei tur nei tawh lova inhriaa mahni nunna lak hrehna nei tawh lo leh la ta mai tam tak an awm a. Natna khirh ber ber tawka Lalpa beisei ngamm miah lo an awm bawk a. Keini chan hi chu lawmawm tak a la ni. Hetiang reng hi a ni dawn bik lo tih erawh hria ila.


Chuvângin *'Tun'* bâk hi chhandamna chan nâna ṭha a awm lo ve. Nakin chu a thleng dawn nge dawn lo a hriat si loh va. Tuna kan dinhmun ṭheuh hi i han in chhut ngun teh ang. Chhandamna changtu niin Pathian tâwk mai tur hian ka inpeih tak meuh em?


*Chhandamna hnathawh hun a ni:*

Kan vêlah Chhandamna mamawh em em tam tak an awm a. Thihna kotlanga dâk, Lalpa nena inremna mamawh em em tam tak an awm a ni. 


Ringtute lâkah beiseina sâng tak an nei a. Kan kût hi Lalpa chhandamna hna thawh nân kan phal a ngai. Kan neih thilte hi chanchin ṭha hril nan kan phal a ngai ta a ni. 


Kan tunlai boruakah ngat phei chuan Biak inah chanchin ṭha sawiin a puan theih loh. Kan thusawi hre pha tur an tlem em em si a. Chanchin ṭha hril erawh kan bâng thei si lo.


Kan vêla mite, mamawhtute tân hian engtin nge kan hril ang? An ṭawngṭaia Lalpa an auhna chhanna hmanrua ni tur hian Lalpahman theihin kan awm em? 


Tam tak chuan mangangin Lalpa hi an lo kar ve thei a nia. Kan kiang maiah, keini ringtute kiang maiah hian baihvai tak tak, mihring khawsaka harsa lutuka mangang te, dam lohna thil leh ei leh in avâng ringawt pawha mangang an awm thei. Manganga Lalpa an auh lai hian kan inpekna azirin an ṭawngṭai chhanna hmanruaah Lalpan min hmang thei a, Lalpa hmuhtirtu leh a ke bula hruaitu kan ni thei.


A châng chuan mahni in lama kan lo ṭawngṭaisak ai hian kan ṭanpuina kut hi an thlahlel mai thei asin. Chu chuan kan ṭawngṭaisak ringawt aiin hlawk zawkin chanchin ṭha a hril thei a ni. Ringtute hi min thlir a, min chhiar ṭhin a nia. 


Thlarau lama ṭanpui mamawh ngawih ngawih, pan tur leh belh tur hre lo an lo awm thei. Inkhawm a theih si loh va, thlarau nun chawmtu thil hrang hrang kha a theih loh va. Mahni inawi nung zo tawh si lo kan rawngbawlpui leh ṭhiante, ṭhenawmte ah hian an lo awm nual thei asin. Chûng mite tâna pan theih leh belh theih ringtu chu nih tum ila. *Tun hun harsa hi hun lawmawm, chhandamna niah i hmang dawn teh ang u.*

Comments

Post a Comment

Popular posts from this blog

 *A INHRIATCHHUAH VE LEH* October 3, 2021 (Pathianni tûk) thuchah. _PP. Laldingngheta Sailo_ *Châng thlan:* _Luka 15:17-19  Tin, a inhriat chhuah veleh, ‘Ka pa hnena inhlawhfate chaw ei sen lohva nei an tam vei nen, kei lah chu hetah riltamin ka thi dawn si a!_  _Ka tho vang a, ka pa hnenah ka kal ang a, a hnenah, Ka pa, vana mi chungah leh nangma mithmuhin thil ka tisual e;_  _i fapaa vuah tlak ka ni ta lo ve; i hnena inhlawhfa pakhat angin mi siam ve rawh, ka ti ang,’ a ti a._ *Sawizauna:* Fapa tlanbo tehkhin thu hi beram bo leh duli bo chungchang tehkhin thu dawta Isua sawi a ni a. A pathum hian Pathian hmaa sima kirte chunga lâwmna a entir vek a ni. Tehkhin thua pa ber hi mi hausa tak mai, ram leh chhiahhlawh tam tak nei niin sawi a ni a. A fapate pawhin khawtlangah ngaihpawimawh hlawhin dinhmun ṭha takah an ding ngei ang tih a rinawm a. Nimahsela, chuta lungawi zo lo chuan fapa naupang zawk chuan a ro chanai lâin ram hla takah nuam chen turin a va kal ta a ni. A...
Read more
*Thlarau Thianghlim - Ringtute ralthuam* Têt lai/naupan lai khân kan indo lem/ in ṭheng ṭheng ṭhin a. Silai lem kan hmang a, kan in kâp ṭhin a. Kan kâ hmangin silai kah ri kan siam a, kan han inkâp tak tak chu kan tlu ve phak phak zel a, kan let ve tawp tawp zel ṭhin a nih kha. Nimahsela, silai tak ni lo na na na, a mu awm lo na na na chu kan tho leh mai a. Kan tlan leh zuai zuai ṭhin. Indona tak takah khatiang khan kal ta ila, khâng silai lem hmang khan va do ve ta ila, tumah kan that lovang a, kan hneh ngai lovang. Keimahni kan thi zawk hial ang. Ringtu nun chu indona a ni a, sual sipai nen ni tin kan indo ṭhin. Tam tak chuan naupan laia kan indolem ṭhin ang mai khan ralthuam lem tak tak kan hmang a, thirkawr lem kan ha a, hmanraw lem hlir kan hmangin kan inbel a. Indona mualah kan tlawm leh nge nge ṭhin. Biak Inah theihtawpa ṭhain kan inkhawm a, theihtawpa active-in Kohhranah kan che tla a, chûng chu ralthuam atan kan hmang ṭhin a. Mi beihnan kan hmang ṭhin a. A inhmang...
Read more
*Malsawmna danglam* Vawiin chu kan naute-in a  vawi thum nan vaccine a la a. A ṭap a, a khua te a sik a. Nausên mai a nih avangin ka lainat ngei mai. Hêng vaccine te hi nausên tan chuan a nâin an han chiu hian an ṭap vawn vawn zel a. Hmangaihtu tan chuan hmuh hrehawm tak a ni ṭhin. Tin, an khua a han sik a, hmangaihna leh khawngaihna nena en kan ni bawk a, hmuh an hrehawm ṭhin ngei mai.  Nimahsela, kha vaccine kha a nakin hun atan a ṭha dawn a. Natna chi hrang hrang lo do thei tura a taksa buatsaihna a nih avangin tunah hmangaihtu tan hmuh hrehawmin a tan nâ viau mahse, a khua hial tisik mahse kan tihtir lo thei lo a ni. A tun hun chauh ngaihtuahin khawngaih ta ila, nakinah natna hrang hrang lo thlengin a taksa hian a lo hmelhriat si loh chuan natna dotu a siam zung zung thei dawn si lova. A tan a ṭha dawn lo a ni. Chuvangin,tunah harsa mahse nakinah a tana ṭha zawk tur avangin kan laktir hram hram a ni. Hei hian kraws kawng min ngaihtuahtir a. "Tuarna pumpelh kawng zaw...
Read more