*A HMASA BERAH PATHIAN*


July 25, 2021 (Pathianni) thuchah


_PP Laldingngheta Sailo_


*Châng thlan:*

_Joba 1:21   Ka nu pum ata saruakin ka lo chhuak a, saruak vekin ka kir leh dawn a nih hi; LALPAN a pe a, LALPAN a la leh ta a; LALPA hming chu fakin awm rawh se, a ti a._


*Sawizauna:* 

Joba lehkhabu hian mipakhat buaina tâwk mêk chanchin a sawi a. Mihring zinga tuarna lo awm ṭhin leh chuta Pathian lo tel ve dân hi a buaipui ber a ni. Joba, mi ṭha tak, Pathian zah, thil ṭha lo ti ngai lo chanchin a ni. Pathian a hmangaih a, a ring a, malsawmna tam tak a dawng a, fa tam tak neiin hrisel tak leh hausa takin a awm a. Amaherawh chu fiahna avangin a thil neih zawng zawng laksak a ni a, amah ngei pawh tuarna rapthlâk takin a tlakbuak zui ta a ni. Chûng zawng zawng a tuar chhung chuan Pathian a sawi chhe lo va, thu sual a sawi lo. Lalpa a hmangaih leh rin tlatna chuan rah ṭha tak chhuahin Pathian hria mai ni lo, a hmuha hmuin malsawmna tam tak, thlarauvah leh tisaah a chang ta a ni.


*Pathianin Joba a fiah:*

Pathian rorelna hmunah, vantirhkohte Lalpa hmaa an inlanna niah chuan setana pawh a rawn inlan ve a. Heta setana tih hi "hêktu" tihna a ni. Pathian chuan Joba hi a chhuang ve hle a ni tih a hriat a. Setana hnenah chuan Joba anga lei chunga sawiselbo, mi dik, Pathian ṭih mi, thil ṭha lo laka insum thei an awm lo tiin a hrilh nghe nghe a. Setana erawh chuan a malsawmna nasa tak avanga Pathian chu hmangaih mai a nih thu leh malsawmna tam tak dawn miau chuan thil harsa a ni lo tiin Pathian chu a kut thawh a, Joban malsawmna a dawnte a laksak chuan Pathian a hmangaih loh sawt tur thuin a chhâng a. Pathian chuan fiah phalin a nunna erawh zuah turin setana kutah a dah ta a. 


Tichuan a neih zawng zawng chu laksakin a awm a. Nikhat thil thuah a hausakna zawng zawng leh a chhungte zawng zawng a chân vek ta thut mai a. A hrilhhaithlakin a thinrimthlak viau awm e. Nimahsela, Joba chuan thu sual engmah a sawi hauh lo va. Pathian a la fak zawk a ni.


Setana chuan amah tak khawih loh vangah a la puh leh a, Pathian pawh chuan setana kuta dahin Joba chu a khawihtir leh a, nimahsela, a nunna erawh zuah turin a ti a. Chutah chuan mut theih loh, ṭhut ṭhat theih loh engtianga awm pawha nuam awm lo khawpa nain setan chuan Joba chu a han khawih leh a. A nupui pawhin Pathian sawichhiaa thi mai turin a ti hial a. Nimahsela, a hmangaih Pathian sawichhiatna aw ka reng a la chhak chhuak ta chuang lo. 


*Kan zir tur:* 

He Joba nun leh a chunga thil thleng aṭang hian ringtute hian zir tur pawimawh tak mai kan nei a ni. 


*Pakhatnaah chuan Joba hian thil dang zawng aiin Pathian a hmangaih a ni:* 

Setana khân Joba'n Pathian a rin chhan leh a hmangaih chhan chu malsawmna tam tak a dawn vangah a ngaihsak a. Chumi avang chuan a neih zawng zawng leh ama nunna ngei pawhin nasa taka tawrh phah khawpin fiahna a paltlang a. Chûng fiahna zawng zawng chuan Pathian a rinna leh hmangaihna a tidal lo va, chûng malsawmnate avânga Pathian hmangaih chu a ni lo tih a takin a lantir a. Pathian tân chuan malsawm leh loh chi a ni lo reng reng a ni.


Keini pawh hian engkim dang aia Lalpa engkim neitu hi hmangaih hmasa ber tur kan ni tih hi i hre thar leh ang u. A châng chuan mahni lam inchhêk arbawm a, khawsak nawm phawta rawngbawlte kan tum a. Dam phawt, hlim phawt, harsatna solve phawt hnua rawngbawlte kan han tiam ve khanglang ṭhin. Nimahsela, kan beisei ang diak diakin thil a thlen ṭhin loh avângin kan tum angin kan awm lo va, Pathian awm rin lohna hialte kan han nei ta ṭhin a. Joba ang hian dinhmun hniam ber leh thih chauh hmabâk tawha kan inhriat lai te, harsatna namên lo tak kan tawh laite pawh hian Lalpa hmangaih hi thlang hram hram ang tur kan lo ni zawk. A hmasa tur dah pawimawh hmasak hian a hnu dawl tur dik tak hian hnu a rawn dawl ṭhin. Pathian hmangaih thlang hram hram tute hi a ni a tawpa hlima lawm leh ṭhinte chu.


*Pahnihnaah chuan - Pathian phal chin bâkin setanan thil a tithei lo:*

Setana hi thil tithei ve viauin lang mahsela, Pathian remtih chin bâkin zu han che thei hauh lo va. Thei se chuan Joba pawh kha tihhlum hial a duh ang chu. Nimahsela Pathianin "A nunna chu khawih suh" a tih miau avangin thi lo tâwk chauhva tawrh hrehawm ber tur khân a  tuartir a nih kha. A lungawi zo kher lo vang. Mahse a aia thiltithei zawk Pathian thu bâk a pel thei tlat lo.


Kan nuna harsatna thleng tam takah hian kan beidawngin Pathian hian kan dilnate pawh chhâng ve thei lo emaw ngaithla lovin kan hria a ni mai thei. Mahse Pathian hian min chhâng a, kan chunga thil thlengte hi a hriatpuiin a thleng a ni tih hi kan pawm tur a ni. A phal chin bâk erawh chuan engmahin min khawih thei lo vang tih hi hria ila. Pathianah kan rinna i nghat zel ang u.


*Tâwpna:* 

Min hmangaihtu Pathian hian kan hmangaih lêt ve a duh ṭhin a. Hmangaih lêt ve a duh mai ni lovin thil dang zawng zawng aia amah hmangaih turin min duh a ni. Keini chuan malsawmtu aiin malsawmna kan duh fo va, hmangaihtu aiin ropuina kan thlang ṭhin. Chu chu Pathian thil tum leh duh a ni lo tih hria ila, hmangaihtu hi i hmangaih ve zel phawt ang u. A duh chuan malsawmna chu kan dawn sên loh khawp pawhin min pe thei a ni.


Thuneihna vawrtawp neitu chu kan Pathian a ni. Sualin min bawih bet viauin kan hria a ni thei a. Hmanraw tam tak (zu, damdawi, etc) te hmangin a bawih ata chhuak thei lo tura inngai khawp hialin setana hian min bawhbet a ni thei e. Pathian phal baka thuneihna nei miah lo a ni tih hi hria ila. Setana ai chuan kan rin Pathian hian thil a tithei zawk tih hi i hre nawn fo ang u.

Comments

Post a Comment

Popular posts from this blog

 *A INHRIATCHHUAH VE LEH* October 3, 2021 (Pathianni tûk) thuchah. _PP. Laldingngheta Sailo_ *Châng thlan:* _Luka 15:17-19  Tin, a inhriat chhuah veleh, ‘Ka pa hnena inhlawhfate chaw ei sen lohva nei an tam vei nen, kei lah chu hetah riltamin ka thi dawn si a!_  _Ka tho vang a, ka pa hnenah ka kal ang a, a hnenah, Ka pa, vana mi chungah leh nangma mithmuhin thil ka tisual e;_  _i fapaa vuah tlak ka ni ta lo ve; i hnena inhlawhfa pakhat angin mi siam ve rawh, ka ti ang,’ a ti a._ *Sawizauna:* Fapa tlanbo tehkhin thu hi beram bo leh duli bo chungchang tehkhin thu dawta Isua sawi a ni a. A pathum hian Pathian hmaa sima kirte chunga lâwmna a entir vek a ni. Tehkhin thua pa ber hi mi hausa tak mai, ram leh chhiahhlawh tam tak nei niin sawi a ni a. A fapate pawhin khawtlangah ngaihpawimawh hlawhin dinhmun ṭha takah an ding ngei ang tih a rinawm a. Nimahsela, chuta lungawi zo lo chuan fapa naupang zawk chuan a ro chanai lâin ram hla takah nuam chen turin a va kal ta a ni. A...
Read more
*Thlarau Thianghlim - Ringtute ralthuam* Têt lai/naupan lai khân kan indo lem/ in ṭheng ṭheng ṭhin a. Silai lem kan hmang a, kan in kâp ṭhin a. Kan kâ hmangin silai kah ri kan siam a, kan han inkâp tak tak chu kan tlu ve phak phak zel a, kan let ve tawp tawp zel ṭhin a nih kha. Nimahsela, silai tak ni lo na na na, a mu awm lo na na na chu kan tho leh mai a. Kan tlan leh zuai zuai ṭhin. Indona tak takah khatiang khan kal ta ila, khâng silai lem hmang khan va do ve ta ila, tumah kan that lovang a, kan hneh ngai lovang. Keimahni kan thi zawk hial ang. Ringtu nun chu indona a ni a, sual sipai nen ni tin kan indo ṭhin. Tam tak chuan naupan laia kan indolem ṭhin ang mai khan ralthuam lem tak tak kan hmang a, thirkawr lem kan ha a, hmanraw lem hlir kan hmangin kan inbel a. Indona mualah kan tlawm leh nge nge ṭhin. Biak Inah theihtawpa ṭhain kan inkhawm a, theihtawpa active-in Kohhranah kan che tla a, chûng chu ralthuam atan kan hmang ṭhin a. Mi beihnan kan hmang ṭhin a. A inhmang...
Read more
*Malsawmna danglam* Vawiin chu kan naute-in a  vawi thum nan vaccine a la a. A ṭap a, a khua te a sik a. Nausên mai a nih avangin ka lainat ngei mai. Hêng vaccine te hi nausên tan chuan a nâin an han chiu hian an ṭap vawn vawn zel a. Hmangaihtu tan chuan hmuh hrehawm tak a ni ṭhin. Tin, an khua a han sik a, hmangaihna leh khawngaihna nena en kan ni bawk a, hmuh an hrehawm ṭhin ngei mai.  Nimahsela, kha vaccine kha a nakin hun atan a ṭha dawn a. Natna chi hrang hrang lo do thei tura a taksa buatsaihna a nih avangin tunah hmangaihtu tan hmuh hrehawmin a tan nâ viau mahse, a khua hial tisik mahse kan tihtir lo thei lo a ni. A tun hun chauh ngaihtuahin khawngaih ta ila, nakinah natna hrang hrang lo thlengin a taksa hian a lo hmelhriat si loh chuan natna dotu a siam zung zung thei dawn si lova. A tan a ṭha dawn lo a ni. Chuvangin,tunah harsa mahse nakinah a tana ṭha zawk tur avangin kan laktir hram hram a ni. Hei hian kraws kawng min ngaihtuahtir a. "Tuarna pumpelh kawng zaw...
Read more