*Zion khawpui ka pan laiin,*
*Suala hliamin ka lo tlu a;*
*Nangmah lovin ka thla a ngam thei lo,*
*Hmana ka lawmna ber Thlarau, min hruai leh rawh.*

He hla hian ka ngaihtuahna a luah a, ka rilruin ka sa ka sa a. Ringtu nunah hian he hla hian thu a va sawi thui êm ka ti.

Vanram kawng kan zawhnaah hian sual hian nasa takin min beiin min do ṭhin a. Sual hliam tuarin ka tlu leh ṭhin.

Ringtu nun kawngah hian harsatna tam tak a awm ṭhin a, hneh theih loh chang ka ngah ṭhin. Mahnia ka beih hian ka chau ṭhin a. Thlarau Thianghlim tel lovin, ka mihring ṭhatna hian rawng te ka lo bawl a, hahthlak tak a ni ṭhin.Davida khan Saula thuam a inbel khan a kalpui hlei thei tlat lo. Lalpa hmanrua a ni lo tlat. Eng ang pawhin felin fing mah ila, eng anga hausa leh hmingthang pawh ni ila, Lalpa Thlarauva thuam kan nih loh chuan kal a lo har ṭhin em a ni.

Lalpa rawngbawl a, vanram kawng kan panna ah hian Thlarauva thuam kan nih loh chuan sual hian min hliam fo ṭhin a, nung lo takin rawng kan bawl a, peih chinah kalin a nuam bak kan pel peih lova. Chu chuan kan ringtu nunah beidawnna min siam a, midangte leh Lalpa lawmzawng mai ni lo, mahni lawmna khawpa rawngbawl a harsa a, kan vui kan vui a, kan chau mai ṭhin.

Ka rawngbawl tawhna ka en lêt hian ka hlim leh lawm lai ber chu Thlarauva rawng ka bawl lai, a hruai theih tura ka inpek lai kha a ni.

A hruaina ngaichang lova, keima duhdana ka kal leh ka lawmna chiah ka ngaihtuah hian ka buai ṭhin.

Ringtute hian Zion khawpui kan panna kawnga pawimawh ber pakhat chu Thlarau hruai theiha awm hi a ni.

Tunah hian eng berin nge min hruai le?

*Hmana ka lawmna ber Thlarau min hruai leh rawh.*