Vawiina ka lehkhabu chhiar, *"Ka zawh lamtluang"* tih Rev. H. Lengluta ziaha mi, Lal pakhat leh a fapa chanchin chuan min khawih thar hle mai.

Lal pakhat a awm a, fapa pakhat, a ai la awhtu tur leh a roluahtu tur a nei a. Vanduaithlak takin an in bul tuichhunchhuahah a fapa chu a tla hlauh mai a.

Lal chu ṭanpuitu tur zawngin a chhuak a, mi a va sawm a. Tichuan, an let leh a. Pakhat chuan hruizen chu tuichhunchhuah kamah lo chelhin pakhat chu a lut ve ta thung a. Tichuan, Lal fapa chu him takin an chhanchhuak ta a ni.

Lal chu a lawm em em a, a fapa chhanchhuaktute chu lawmman pek a duh ta a. Tuin nge lawmman chu chang tam zawk ang? Tuichhunchhuaha lut khan nge tuichhunchhuah pawna lo awma a hnuk chhuaktu zawk khan? Lal thu tlukna chu "A inang rengin lawmman chu an chang ang" tih a ni.

Helai ka chhiara ka rilrua rawn lang nghal chu, mi tu emaw missionary a ni a, thlarau bote a man a, tin, pastor leh evangelist te pawhin camp leh crusade hmangtea thlarau bo an man hian, "I lallukhum a chhah bîk dawn mang e," kan intih ṭhin hi a ni.

Hetia thlir mai hi chuan a dikna chen pawh a awm mai thei e. Nimahsela, Pathian hian a rawng kan bawlna tur atan hian min dahna bik hi a nei ṭheuh a. Chu min dahna ṭheuhvah chuan rinawm takin rawngbawl ila chuan lawmman dawng chhah bik leh tê bik hi awm theiin ka ring lo.

Tuichhunchhuaha lut leh a lo pawt chhuaktu kha an pawimawh dan a inchen reng a ni. Lut ringawt se, pawt chhuaktu an awm loh chuan a chhuak thei lovang. Lut an awm lohvin lo pawh tum ngawt kha a theih loh vang. Chuvangin, lawmman dawng tur khan a luta leh a pawttu kha an pawimawhna a inchen chiah a ni. Pek tam bik theih an awm lo.

Mi, ram thim kan tiha an kal a, ringlo mi kan tihte an zuk rintir a, chhandamna thu an zuk hrilh ṭhin avanga an lallukhum chhah bik thu a awm lo va, pastor leh evangelist a nih avanga lawmman ṭha bik dawng tur a ni lo.

Mahni zawna hna ṭheuh hi Krista rawng ka bawlna a ni tia ṭhahnemngai leh rinawm taka ka lo tih hi Lalpa hian a hria a ni. Office-a thawk ka nih chuan rinawm takin, contractor ka nih chuan dik leh tling takin, mi hnuaia inhlawhfa ka nih chuan taima leh hlawh hmu tlakin, chutiang zel chuan mahni hnaah ṭheuh rinawm ila.

Tin, kohhrana kan rawngbawlnaah pawh missionary, pastor, evangelist ni lo mah ila tualchhung kohhrana ka rawngbawlnaah te, bial huap leh ṭhalai, nuho leh paho rawngbawlna zawnah te pawh a ni ang, kan kova mawhphurhna tla hi lian leh tê bik awm lova Lalpa rawng kan bawlna vek a ni tih hria a lawm taka kan thawh zel hi Lalpa lawm zawng a ni a, field-a lutte aiin kan pawimawh nep chuang lo tih kan hriat a ṭha hle a ni.

Mi tin, an thiltih ang zela lawmman pek tur a ni a, kan kal chhuah leh kan pek tam lam, nihna kan ngah lam leh mawhphurhna kan ngah viau lam ai chuan kan nihna leh kan dinhmun, kan awmna a zira kan kova rawngbawlna awm kan hlen chhuah dan zawk hi lawmman min pek chhan tur chu a ni.

Lalpa min dahna hmuna kan awm dan, rawngbawlna kan hlen dan zawk hi Lalpa hnen atan kan lawmman kan hmuh chhan tur zawk chu a ni.