*Pathian hmangaih dân*

Ka rilrua awm reng leh ka ngaihtuah fo ṭhin, min tiluhai a, min tibuai fo ṭhin chu *"Engtin nge Pathian hi ka hmangaih ang?"* tih hi a ni.

Mihring kan inhmangaih dan ka ngaihtuah a, nula leh tlangval inhmangaihna te, nu leh pa leh naupang inhmangaihna te, a tam thei ang.

Mihring inhmangaihna anga han teh hi chuan kan bialnu/bialpa, kan nupui/pasal, kan nu leh pa, kan fate kan hmangaih ang hi chuan Pathian hi hmangaih zo hian ka inhre tlat lo ṭhin a, a hrehawm ka ti ṭhin. Anni hi Pathian ai chuan ka hmangaih fein ka hre ṭhin a, ka rilrua anmahni  ka vei chanve pawh hian Pathian hi ka vei lo niin ka hre ṭhin.

Thinlungin kan invei tlut tlut a, rilru an luah reng a, kan ngai em em a, thikthu a chhe em em ṭhin bawk. Nimahsela, Pathian hi chutiang taka vei a, rilrua ngaih veng vengna te hi a awm mawh em em a, vei rùnna te, leh mihringin inkara thleng ṭhin ang, hmangaihnain a ken tel tam tak hi Pathian ka hmangaihnaah hian telin ka hre tlat ṭhin lo.

Thinlung chuan a duh a, mahse ka hmangaih thiam si lo. Ka rilru ka pe tak tak thei lo nia inhriat chang ka nei fo ṭhin. Harsa ka ti hle ṭhin.

Mahse, hei hi ka hre chhuak leh ṭhin, *"Hmangaih che ka thiam nem maw, i duh zawng tih mai loh chu,"* tih hi. Ni, Pathian kan hmangaihna lantirna chu a duhzawng kan tih mai hi a ni.

Pathian avanga kan tih ṭhinte hi kan hmangaihna lantirna a ni. Amah avanga kan peih loh tak thil kan tih hram te, kan duh ngawih ngawih kan chân ṭhin te, kan tih châk em em kan tih loh phah te hian Pathian kan hmangaih a lo ni.

Kan rilru tak chuan khawvel thila pên te, nuam tih zawng, châk zawng tak han tih kual velte kan duhin kan châk ṭhin. Mahse Krista avangin a rem lo fo ṭhin. Ka rilru tak chuan ka châk et et ṭhin a, ka ngaihtuahna chuan a zui fo ṭhin. Mahse Krista avanga a taka ka tih rem si lo a tam ṭhin. Chumi ka hnawl ngamna chu Krista ka hmangaihna chu a ni.

A chang chuan ka châk miah loh, ka duh ngai miah loh, ka zah ngawih ngawihna tur thil ka tih a ṭul thung a, ka mualpho dawn nia ka inhriat pawh Krista avanga ka tih a ṭul châng a awm ṭhin. Mahni indahṭhaa khang thil ka tih khan Krista chu ka hmangaih a lo ni zel mai.

Ka phur viau avanga ka inkhawm te, ka lâm ve ṭhin te, Kohhrana ka inhman ve viau te, hruaitu ka nih avanga Pulpit tlanga thu ka sawi ṭhin avangte hian Pathian ka hmangaih a ni ringawt lo.

Krista ka hmangaihna avang zawkin ka ti ṭhin tur a ni zawk a, ka tih ṭhinte ka bansan a ṭul zawk a, ka tih ngai lohte tih a ṭul zawk fo bawk. Hêng zawng zawng hi Krista avang a nih chuan Krista chu kan hmangaih a ni.

Amah kan hmangaih avangin kan mittui a tla ve lo mai thei a, kan phul hlut ve lo mai thei, thu kan sawi tlawr duahin kan lam ve kher lo thei. Mahse, Krista avanga tih ṭul nia kan hriat kan tih te, Amah avanga kan kova tla kan hlen chhuah te, Amah avanga kan tih loh tur kan tih loh ngamna te, etc. hi Pathian kan hmangaihna a ni zel tih hi hria ang u.

Hei hian ka khaikhawm ang. *Hmangaih che ka thiam nem maw, i duhzawng tih mai loh chu. Ka hmangaih che, Min hmangaih si a.*

Good night.