Khawvel hian hlimna min pe lo tih hrereng chung hian khawvelah hlimna ka la beisei tang tang a. Natnate hi khawvel kan awm chhung chuan a bo lovang ti thin mah ila ka han tawh chuan ka complaint a, harsatna ka tawhin hringnun hi famkim lo a ni ti chungin afair lo ka ti leh si thin. Mahse heng zawng zawng ka tawh lai pawha beiseina thi ngai lo *hlimna hian min hnuchhawn mahsela, ka enna Krista ka tan a tawk e* tih hi a ni.

Khawvelah i nunna khan hlutna nei tawh lovin i hria maw? Nun hlutna i hloh ta em ni? Nunna hi khawvel min pek a ni lova, Lalpa min pek a ni. A petu hian a uiloh leh a roh loh em avanga min pe a ni lova, ama tan vêk min pe a ni mai. Nun chhan tur ka hai avang hian nun hlutna hi kan theihnghilh fo thin.

Khawvela kan beisei thilte hian min tibeidawng thin a, chu chuan nun hlutna min hmuh hmaih tir thin.

I nun kha a hlu ta lo tihna a ni lo... A pek tur dik taka hnenah kan pek loh chuan thil reng reng hian hlutna a nei ngai lo. Vawk hmaah chuan lunghlu pawhin hlutna a nei lova, zaithiam pawh bengngawng hmaah chuan engmah a ni lo. Hmelthatna pawh hi a hmutu tan chauh a ni a,  mitdel hmaah engmah a ni lo. Khawvel hian nangmah atanga a hlawkna tur a hmuha a lak zawh vek chuan amahah hlutna i nei tawh lo.

I nun kha a neitu tur dik tak hnena i pek chuan a aia hlu a awm lo. A neitu tur dik tak hnenah chuan pe la nangpawhin nun hlutzia i chhar leh ang. Ar hmaah chuan Rangkachak tlang sangkhat aiin buh fang khat pawh a hlu zawk. Tunge i nih, engnge i nih lam a ni lo. I inpekna tura kha tunge, engnge a nih tih lam a ni zawk e.

Inpekna tur dik taka hnena i inpek chuan nun hlutna leh beiseina  i hloh ngai lovang.

Ni hman nuam le.