*Ka nun hlui leh sul hnu a chhui ve lo.*

Ka ngaihtuah ka ngaihtuah ṭhin a, ka nun liam taah khan Pathian duh loh zawng chu sawi loh, keimah ngei pawhin ka pawm hleih theih loh, ka zahpui em em, midangin an hre ve ang tih ka hlauh ngawih ngawih thil tam tak ka lo ti tawh a. Ngaihtuah chhuah mai pawha ka zahna ngawih ngawih tur thil tam tak ka lo ti ṭhin.

Theih nise chûng nun duhawm lo tak takte chu siam ṭha turin hun koh kir a, nun hman ṭhat leh ka chak fo ṭhin.

Theih ngat se chuan hun liam tawha kir leh a, kan thiltih ṭhenkhat nawtreh tura lêt leh duh kan tam viauin ka ring. Chûng zingah chuan ka bâng lo chiang khawp mai.

Nimahsela, a tua te mah hian nunhlui an kokir thei lova, hun liam taah lêt thei an awm hek lo. Duh teh mah ila nun siamṭha tura kir leh chu mahni lu dawlh tum ang hlauhva harsa a ni si.

Siamṭhat theih loh kan thil lo tih tawh tam tak chuan ser nung min siamsak a, mi zinga tuitla lo takin min siam ṭhin. Mite zinga inkiltawih leh hrehawm ti taka min siamtu a ni fo bawk. Mahni leh mahni kan inngaidam thei lova, midang ngaihdam pawh kan harsat ṭhin. Hêngte avang hian nun hi a va hrehawm ṭhin em.

Nimahsela, Isua Krista rorêlnaah chuan khawi party mi leh sa nge a lo nih ṭhin tih lam a ni lova, eng nun nge a neih ṭhin tih lam a ni lo.

Nun siam ṭha tura hun hluia kir leh a ṭul lova, tuna kan hun hman mek aṭang hian Krawsah siam thar kan ni thei reng a, kan nunhlui hi min teh nan a hmang ve ngai lo.

Vawi engzata tam nge kan tihsual a, engtia nain nge kan tluk ṭhin tih lam a ngaipawimawh lo. Nu leh pain an fate kal zir lai  chu tlu fo mahse kal an thiam chiah chuan an lawm em em ṭhin a, an tluk nasatzia te, an tluk nat dan te lam ni lovin an kal theih thu uar takin an sawi ṭhin. Isua hian kan tluk tam lam, kan chetsual tam lam ni lovin kan tluk a kan thawhleh dan hi hmuh nuam a ti a, a hmuh duh zawk a ni fo.

Kan nunhlui ni lovin kan tun huna kan nun hi a ni a duh zawk ni.