*Chuvângin hêng thu hian inthlamuan rawh u*

He thu hi Lalpa lokal lehna chungchânga Paula'n min Thessalonika khua ami te hnena a chah a ni. Chu chu Lal Isua ringtu zawng zawngte tâna pawimawh a ni bawk a.

Nizan kan inkhawmah chuan "Lal Isua lokal lehna hi amah ringtute hian kan nghakhlel em?" tih sawiho tur chhawpchhuah a ni a. Han ngaihtuah mai hi chuan zorama Lal Isua ringtu inti tam tak hi chuan *kan nghakhlel lo* tih hi a hriat mai âwm e. Kan rawngbawltu pakhat phei chuan *"sunday tûka sa hmeh tûr tluk pawhin kan nghakhlel lo"* a ti hial a. A dik âwm mang e ka ti. Nghahhlelh chu sawi loh *a tam zawk(?) hian kan hlau* ni zawk hian ka hria.

Kan rin Pathian thû ngei chuan Lal Isua lokal lehna thû hian *lo inthlamuan rawh u* a ti a, chutih rualin keini erawh chuan Lal Isua lokal lehna sawi hian min tihlau zawk ṭhin niin a lang a, insawiṭhaih te pawh kan ang hial zawk ṭhin a ni.

Kan thlamuanna tûr ber kan hlauh tlat chhan hi engnge ni ta ang aw? 🤔

Ringtu hmasate, Lal Isua avânga tihduhdah tuartute kha chuan Lal Isua a rawn lan leh hun an nghakhlel em em a, tihduhdahnate pawh tuar hram hram tura infuihin *Maranatha (Lalpa a lokal leh dawn)* tiin an inthlamuan ṭhin a ni. Pathian thûin a sawi ang takin inthlamuan nan an hmang ṭhin a ni.

Tin, zorama kan Kristian hmasate pawh khân dodâlna nasa tak an tawk ṭhin a, hrehawm nasa tak an tawk a, khua ata hnawhchhuah te, chhungte tuithlâr te leh harsatna hrang hrang an tawk a. Chûng hrehawm tam tak avâng chuan Lal Isua lokal lehna kha an nghakhlel ve hle ṭhin a ni. Mizo hla hmasa ho, thlarauva phuah tam takah hian an nun hlim thla hmuh tûr a awm a ni.

Engatinge tunlai ringtute hian Lalpa lokal lehna hi kan nghahhlelh tâk loh êm êm a, kan hlauh tâk tlat zawk le?

A chhan tam tak a awm ang a, pakhatah chuan *Lal Isua avângin hrehawm kan tuar tlem ta êm êm* hi a ni thei ang. Lal Isua avânga tawrh tûr leh hnawl tûr tam tak a awm a, khawvêl mite tih ang zawng zawng tih ve theih loh tam tak a awm. Mahse kan tunlai ringtute hi chuan *Kraws chuan khawvêl nen min ṭhen hrang ta* tih te hi chu a bâin kan sain *Krista thil leh Kaisara thil kan kaikawp a, khawvêl leh Krista kan chawmpawlh ta nawk nawk a, Krista thil engmah hian khawvêl mite lakah danglamna min siamsak ta lo* a nih hi. Khawvêl mite'n an tih ang apiang kan ti ve a, an nun ang apiangin kan nung a. *Engkim tithei neitu kan nih hi engkim tih theihna emaw tiin a letling zawngin kan hmang a.* Chawm bawka hawp bawk policy kan apply a. Kan tawrh ve na tûrah pawh a tuarna pumpelh zawnga kalin a nuam lam kan zawh zel a. Kraws hi pu lovin kan ak ṭhin ni berin alang.

Lalpa lokal lehna tur thu hi inthlamuan nana miin a hman lai hian kei, ringtu inti, kohhrana rawngbawl mek hian thlaphân leh mangan nan ka lo hmang a nih chuan ringtu inennawn ngai, bul ṭan ṭhat leh siamthar ngai ka ni tihna a ni ang.

*Maranatha*

Comments

Post a Comment

Popular posts from this blog

 *A INHRIATCHHUAH VE LEH* October 3, 2021 (Pathianni tûk) thuchah. _PP. Laldingngheta Sailo_ *Châng thlan:* _Luka 15:17-19  Tin, a inhriat chhuah veleh, ‘Ka pa hnena inhlawhfate chaw ei sen lohva nei an tam vei nen, kei lah chu hetah riltamin ka thi dawn si a!_  _Ka tho vang a, ka pa hnenah ka kal ang a, a hnenah, Ka pa, vana mi chungah leh nangma mithmuhin thil ka tisual e;_  _i fapaa vuah tlak ka ni ta lo ve; i hnena inhlawhfa pakhat angin mi siam ve rawh, ka ti ang,’ a ti a._ *Sawizauna:* Fapa tlanbo tehkhin thu hi beram bo leh duli bo chungchang tehkhin thu dawta Isua sawi a ni a. A pathum hian Pathian hmaa sima kirte chunga lâwmna a entir vek a ni. Tehkhin thua pa ber hi mi hausa tak mai, ram leh chhiahhlawh tam tak nei niin sawi a ni a. A fapate pawhin khawtlangah ngaihpawimawh hlawhin dinhmun ṭha takah an ding ngei ang tih a rinawm a. Nimahsela, chuta lungawi zo lo chuan fapa naupang zawk chuan a ro chanai lâin ram hla takah nuam chen turin a va kal ta a ni. A...
Read more
*Thlarau Thianghlim - Ringtute ralthuam* Têt lai/naupan lai khân kan indo lem/ in ṭheng ṭheng ṭhin a. Silai lem kan hmang a, kan in kâp ṭhin a. Kan kâ hmangin silai kah ri kan siam a, kan han inkâp tak tak chu kan tlu ve phak phak zel a, kan let ve tawp tawp zel ṭhin a nih kha. Nimahsela, silai tak ni lo na na na, a mu awm lo na na na chu kan tho leh mai a. Kan tlan leh zuai zuai ṭhin. Indona tak takah khatiang khan kal ta ila, khâng silai lem hmang khan va do ve ta ila, tumah kan that lovang a, kan hneh ngai lovang. Keimahni kan thi zawk hial ang. Ringtu nun chu indona a ni a, sual sipai nen ni tin kan indo ṭhin. Tam tak chuan naupan laia kan indolem ṭhin ang mai khan ralthuam lem tak tak kan hmang a, thirkawr lem kan ha a, hmanraw lem hlir kan hmangin kan inbel a. Indona mualah kan tlawm leh nge nge ṭhin. Biak Inah theihtawpa ṭhain kan inkhawm a, theihtawpa active-in Kohhranah kan che tla a, chûng chu ralthuam atan kan hmang ṭhin a. Mi beihnan kan hmang ṭhin a. A inhmang...
Read more
*Malsawmna danglam* Vawiin chu kan naute-in a  vawi thum nan vaccine a la a. A ṭap a, a khua te a sik a. Nausên mai a nih avangin ka lainat ngei mai. Hêng vaccine te hi nausên tan chuan a nâin an han chiu hian an ṭap vawn vawn zel a. Hmangaihtu tan chuan hmuh hrehawm tak a ni ṭhin. Tin, an khua a han sik a, hmangaihna leh khawngaihna nena en kan ni bawk a, hmuh an hrehawm ṭhin ngei mai.  Nimahsela, kha vaccine kha a nakin hun atan a ṭha dawn a. Natna chi hrang hrang lo do thei tura a taksa buatsaihna a nih avangin tunah hmangaihtu tan hmuh hrehawmin a tan nâ viau mahse, a khua hial tisik mahse kan tihtir lo thei lo a ni. A tun hun chauh ngaihtuahin khawngaih ta ila, nakinah natna hrang hrang lo thlengin a taksa hian a lo hmelhriat si loh chuan natna dotu a siam zung zung thei dawn si lova. A tan a ṭha dawn lo a ni. Chuvangin,tunah harsa mahse nakinah a tana ṭha zawk tur avangin kan laktir hram hram a ni. Hei hian kraws kawng min ngaihtuahtir a. "Tuarna pumpelh kawng zaw...
Read more